#ParentLicenses2614

有日喺鋪頭出面等外賣目睹一件事，個情景係咁嘅

有個狗主人拖住隻狗喺馬路邊，主人面向馬路，而隻狗就面向行人路，應該係等緊人

隨後有個小朋友（應該兩歲左右），佢爸爸並冇拖住，就衝埋去隻狗度想玩。隻狗冇吠，但就縮埋主人腳邊

突然隔籬鋪頭有個女人衝咗出嚟大鬧，該女人應該係小朋友嘅媽媽

媽媽：「你有冇搞錯呀？你做乜唔拖住阿仔任由佢搞人哋隻狗㗎？！」

爸爸：「吓？Poodle咁可愛唔會咬人個囉！」

媽媽：「不論隻狗咩性格都唔應該搞佢啦，你個仔同佢玩，佢可能以為阿仔想攻擊佢。如果隻狗咬到阿仔咁點？唔通叫人賠錢？人哋有狗帶，你冇拖住個仔，反而係你問題喎！你有冇腦？」

爸爸：「你做咗人哋阿媽成個緊張大師咁，我都唔知你緊張啲咩？玩下唔得嘅？」

然後有位路人阿姨行過爆咗句：「啲男人湊仔唔掂㗎，求乜其咁，我撐你（阿媽）」

個男人立即收咗皮

呢件事上我睇到嘅係，媽媽考咗牌，爸爸未考到

讀者投稿@Ken