#ParentLicenses2500

本來小朋友經大抽獎入咗地區名校，我已經好滿意，但最後老婆知悉小朋友班幼稚園同學有八成都入咗直私，令佢覺得自己嗰個入唔到會輸在起跑線，所以就要小朋友讀私小

雖然我唔太認同，但因老婆堅持，小朋友又話要同班幼稚園同學一齊升小，咁就算啦。但講真，小朋友返學日日都唔開心，佢唔鍾意學校個環境

原本小朋友喺幼稚園時期都開開心心，都無乜比較，自從一上小一後，班家長就變晒質，隻隻怪獸上身，先比較補習興趣班得獎證書，再比較工人姐姐聽唔聽話等等

最近呢班K3寶寶有聚會，有九成人出席，幾乎個個父母都有到場，食吓嘢吹吓水都ok。話題輾轉講到小學生活，大家都開心適應到，只係可能幼稚園寫字太少，做功課比較吃力

我哋小一分三考，頭兩次我哋同校嘅都考得唔好，賴幼稚園真係happy hea慣咗，另外幾個直資嘅都考得唔算好。再講開其中有個同學讀地區名校嘅，好叻考級一，冇外補只上興趣班畫畫打波

我老婆讚佢好叻，但其他家長即時唔認同：「津校程度唔可以同直私比較，佢嗰個考級一，去到我哋直私就同大家同學差唔多level，唔好讚到佢咁叻」

之後又有人話：「好彩直私都唔收佢咋，先有得考級一」

考級一嗰位媽媽冇出聲，微笑就算

最搞笑係，呢班小學雞玩大風吹「有錢讀xx私校嘅走」「冇錢學琴嘅走」「屋企有車嘅走」「有工人姐姐嘅走」「爸爸係老闆嘅走」「讀垃圾學校嘅走」，夾雜住嘲笑聲

嘩！真係聽到火都嚟，真係好想星把佢哋。到我忍唔住叫佢哋玩得禮貌少少，反而令到有個老母出聲：「呢個社會係咁㗎喎，冇料就俾人笑兩句㗎啦」

我同老婆講：「同呢班家長一齊好快都會變質」

我老婆竟然話：「係咁㗎喎，唔想做底層，咁父母要谷吓佢囉」

唉，乜當初BB出世唔係想佢開開心心咩？又話唔做怪獸家長嘅？真係溝通唔到

讀者投稿@小學雞爸爸