#ParentLicenses1913

話說今日去睇戲，諗住平日加上朝早唔多人，點知有件事影響咗我睇戲嘅興緻

睇睇下戲，聽見有人企起身大叫：「唔好再將隻鞋擺我頭度啦！我講咗兩次啦！你唔教你個仔㗎啦？」個男人應該係坐喺我前三排

老實說我聽唔到有人道歉或者有教細路嘅聲，可能好細聲而我聽唔到啦

跟住個男人坐返低，有職員攞住電筒過嚟巡，見人坐返低就行返開咗

再隔咗一陣，我聽到有啲物件跌落地嘅聲，個男人又大叫：「有冇家教呀你哋，講咁多次都唔聽嘅！呀哥仔你哋唔理㗎？呢個女人個仔成日擺對鞋喺我頭度」個男人隨即叫嗰個職員過嚟

個職員疑想息事寧人，著個男人先坐低，然後行去請嗰對母子調位

今次我終於聽到有把女人聲

女人：「點解將我調呀？！你唔叫佢調？」跟住重話：「佢扔咗我仔對鞋落地下呀！」

猶見職員兩難，唯有打電話俾人，就有另一個職員好快嚟咗，同時個電影畫面都暫停咗，院內開咗部分嘅燈，睇晒佢哋個樣

職員們同個男人講咗兩句之後，個男人就離開咗，我唔清楚係咪賠償佢定講咩啦

然後，後來嚟嘅嗰個識員（可能係經理？）同個女人講：「戲院唔可以除鞋㗎，請確保你個仔兩隻腳都著返鞋，唔好再放上櫈上面，如果唔係就請你哋離開，已經影響到其他人了」

個女人唔知係咪知衰定點，就指責個仔：「叫咗你唔好嚟戲院睇戲啦，死都要嚟，喺屋企睇Netflix咪算囉，麻煩到死！」

後來，經理（?）同其他客人道歉話會播返15分鐘前嘅畫面，當時無其他人反對或有意見，唯獨係個個眼睥睥望住個女人

其實睇戲都好睇彩數，遇著啲人無品、踢櫈、大聲討論劇情等等的話，真係會令人好炆

讀者投稿@唔好將隻鞋放係我個頭度