係叻仔嘅!

ParentLicenses1811

最近好多文章都係抨擊啲家長點樣唔管教自己嘅小朋友,反而我想分享下我最近見到有教養嘅小朋友嘅所見所聞

事件係因某茶樓處理手法有問題而引起,而我其實主要想讚個小朋友,而唔係想公審間茶樓,故此唔打算公開茶樓名,廢事大家錯重點

話說,我喺茶樓同屋企人飲緊早茶時,因為我哋坐個位超近門口,就算唔想都會留意到門口發生嘅事

當時有個視障人士拖住隻寫有「導盲犬」字眼嘅狗帶入茶樓,有個講廣東話唔正嘅茶樓職員見到就問佢:「有冇帶車或者狗袋?」

我心諗:「咁大隻點用狗袋呀,講笑咩?」

視障人士:「冇。因為佢係導盲犬嚟,受過訓練唔會咬人,唔會騷擾人」

職員堅持:「唔得喎,我哋呢度一係入狗袋,一係用狗車」

正當我想出聲話個職員個時,坐我對面有個小朋友,應該10, 11歲左右,大聲話:「導盲犬可以入餐廳㗎,唔使用寵物車」

職員猶豫:「要問下經理先,因為我哋驚俾人投訴」

未幾,經理過嚟見到,遂同視障人士講:「你入嚟啦,快少少食,一陣食環嚟查,我哋就大獲」

我心諗:「成間茶樓啲人都冇常識喎」

不過,啲呀婆呀伯嘅眼神就係好嫌棄,雖然人哋因視障睇唔到啲嘴臉,但你哋話「驚會食到啲狗毛」,人哋都有耳係聽到㗎

隨後,個視障人士被安排坐到好後面。而當經過小朋友一家嗰時,個小朋友再話:「唔使理佢哋,隻狗狗好可愛」

最有愛係佢媽媽摸一摸個小朋友塊臉,讚佢叻仔。呢啲鼓勵真係好重要,因為俾個小朋友知道,就算大部人覺得係錯嘅事,其實你(個小朋友)先係啱㗎!

我好佩服個小朋友嘅勇氣,我諗我好似佢咁細個嗰時,應該係唔敢出聲嗰個。咁細個識見義勇為,係叻仔嘅!

題外話,我知道食環係唔會捉導盲犬,而且我再Google確認咗,如果唔俾導盲犬入嘅,有餐廳就係真係犯法

讀者投稿@導盲犬與茶樓

error: