#ParentLicenses1535

話說琴日下晝約咗朋友去睇戲，我不嬲都係早到人士，早到咗半個鍾又見朋友未到，就去starbuxxx買杯嘢飲坐底等朋友

其實嗰間鋪面好大，當日唔係假期，又唔係食飯時間，周圍都有位坐，未滿嘅。當時坐我隔離有個女仔買咗件蛋糕（已食完）同一杯嘢飲，佢邊飲邊睇書

未幾，有兩對家庭（操流利普通話）企喺嗰個女仔面前唔知做乜。我本身以為佢哋係識嘅，但之後聽到有個女人用普通話講咗聲：「吃完了還不走？」

吓，原來係「等位」 ？

其實個女仔坐個位係二人位，根本唔夠佢哋兩個大人同兩個細路坐，咁變相我知道佢想要埋我坐緊嘅二人位

其實當時店內係有其他位，加上我杯嘢啱啱飲一半都冇，就指一指對面張4人枱示意佢哋對面有位

點知佢哋用非流利粵語話：「嗰邊空調冷呀，bb冷」

我心諗：「你個仔都成7, 8歲，仲bb？」

真係當自己大晒，要揀位都喺冇人坐嘅情況下啦，何況我哋兩個坐二人位都冇阻你哋，有位又嫌凍，凍同餐廳講嘛，同我講有x用咩！

之後我同佢哋講：「我等緊人，你叫餐廳較細啲冷氣啦」

佢好似聽唔明我講嘢咁，只係咁話冷冷冷。而另一個女人就同兩個小朋友一齊狂撳手機，仲要係播埋聲，大大聲播出嚟驚死你唔知佢哋睇緊抖音同打機，真心無奈

好彩我個位近bar 枱，職員好似聽到佢哋話冷氣凍，就安排咗佢哋坐另一張4人枱

真心想讚一讚個靚仔職員咁識做，又一眼關七，免除好多不愉快爭執

奉勸各位媽媽出街要為小朋友帶外套，同埋小朋友唔係大晒，唔好教到自己個仔女咁自我中心，一唔滿意就要人就佢，有時要動下腦袋，係唔影響其他人情況下自己解決問題

讀者投稿@其實咪又係一樣