#ParentLicenses1525

話說早兩日學校派咗一人一花返嚟。我個女一拎出嚟，我發現唔妥

我：「吓？得泥嘅？棵花苗去咗邊？」

然後佢喊住同我講：「校車上面有個高年級姐姐整爛咗自己棵花苗之後，就一手搶咗我嗰棵苗，逼我交換」

我個女係啱啱升上小學嘅細B，仲係傻更更嘅妹子，俾人蝦係唔出奇

第一時間我唔係諗住追究，只係覺得冇咗棵花苗點做功課？所以我就打咗畀班主任講返件事。班主任都好好，叫我哋聽日帶返盤垃圾返去換過第二棵畀我哋

第二朝上校車時，我好聲好氣同嗰個高年級姐姐嘅家長講返件事，亦都同佢講我哋已經搵班主任換過棵新苗，唔係想追究，只係叫佢同小朋友傾返

個家長西曬面話：「哦，好小事啫，我聽日叫佢同你交換返囉」

點知今朝上校車時，個家長竟然同我講：「我問過我個女，佢話佢嗰班係派種子，本身就係冇花苗㗎喎！」

佢仲話：「係你個女主動提出話幫我個女種花，我個女先會同你個女交換喎！」

當我白痴？傻的嗎？我大仔都讀緊高年級，之前年年學校都係派發花苗，從來冇聽過一人一花係派種子

好明顯有人講大話
.
呢個家長仲厚面皮到拎返盤花苗畀我個女，叫我個女返學校同老師幫佢個女（嗰個高年級姐姐）換返嗰盆得泥嘅垃圾返嚟俾佢種，因為姐姐冇咗粒種子好傷心喎！係咪癡Q線？我可以點處理？好無奈……

讀者投稿@潘媽媽