#ParentLicenses1521

睇到上一篇投稿，訴說一個單親母親話自己養大咗個女，但個女無盡孝道云云，我閱後有感而發，想分享吓自己嘅故事

我有一個同呢位單親母親好相似嘅爸爸。由細到大，我哋都無乜溝通，無乜傾偈

細個嘅時候，每日一大朝早佢就出去返工，每一晚佢放工返到嚟沖完涼食完飯，就會即刻返入房瞓覺，甚少會同我講嘢，因此我自細都無感覺到太多嘅家庭溫暖，就算住喺同一間屋，大家都好似冇無感情咁，所以大個咗之後，出嚟做嘢，我就自己一個搬咗出嚟住

我搬出嚟之前，只係同佢講咗一句：「我想搬出去自己住」

而佢都只係：「哦」

只發一聲，一個單字咁回應我

當然自己一個人出嚟住之後，佢都係一個電話都無打過畀我，除咗喺佢要錢嘅時候

然後到我結婚大肚，佢都係無理過我。仲好記得我喺醫院生小朋友嗰時，我老公打電話話俾佢聽我就嚟要生；生完嘅時候亦都打個電話同佢報平安，佢都無嚟過醫院睇我

出院之後，亦都從來無諗過要嚟探我或者睇吓個孫，直至當我仔半歲大，要我約佢，佢先第一次見我個仔

之後又係無再聯絡，我亦都無意欲搵佢

後來佢年紀大，無做嘢，偶然會打電話問我拎錢。然而，我係一個全職媽媽，只能睇返當時自己經濟能力，所以都唔係次次畀

我爸爸佢個人一向大洗，而且好鍾意充大頭鬼，無錢都要去大魚大肉、去威、去揮霍金錢

如是者，去到有一次，我又收到佢電話，佢竟然喺出面欠落廿幾萬卡數，搵我幫手，我聽到個電話真係手到震埋，真係喊咗出嚟。我已經唔想考究佢啲錢用咗喺邊，個腦已經係空白一片，但最後都幫佢處理咗欠債

自此之後，我好怕再見到佢來電——一見到佢打畀我，我會好精神緊張同心跳加速，真係好驚、好恐懼

最後，佢喺前年中咗風入院，但我自己照顧唔到佢，只好希望安排佢入住老人院。不過因為一般老人院院費高昂，實在負擔唔起，所以喺佢出院後，我隨即幫佢申請綜援，入住有資助嘅老人院

直到成功入住後，以為安頓好一切，點知呢條友，仲依舊個個月問我拎錢，下下幾千幾千咁拎。有次竟然話自己生日，要我畀三千蚊佢請人食飯

我真係忍唔住問：「無錢學咩人請食飯？無錢仲想學人威？」

當然我再繼續問佢：「點解你住老人院都要用咁多錢？」

佢竟然答我話：「想淨返啲錢畀自己」

我真係忍唔住粗口鬧佢：「我就係無錢先安排你申請綜援住老人院，我真係畀唔起錢。即係我無做嘢，有家庭，唔使留個錢？有錢都要挖乾挖淨畀晒你，我同個仔去瞓街乞食好無？」

去到呢個地步，真係好心灰。一開始我都仲會一星期去一次老人院睇佢，而家真係見都唔想見，電話都唔想聽

可能有人會話我不孝唔理佢，可能我真係無盡到孝道啦，但我真心覺得自己無能為力，真心好想同上一代嘅父母講：「唔好再感情勒索自己嘅子女，我都有自己嘅家庭、自己嘅人生，我自問可以做都做晒，我問心無愧」

讀者投稿@有感而發者