#ParentLicenses1505

有關幼童學寫字一事，我一直都好想投稿，今次我真係忍唔住

關於教小朋友方面，我同丈夫都唔係專家，但我倆深明學習前題，係先要有學習動機，當有其滿足感，先會有動力再學落去

為咗避免打擊小朋友嘅自信心，同埋想佢keep 住學習係樂趣依團火，所以由K2開始學寫字時，雖然有時寫字寫得唔靚，但唔會寫一個追一個咁擦，而係喺佢寫字當中，筆劃錯/成頁當中搵一個寫得真係太衰，先會叫佢再寫過

但自從K3 開始，老師轉咗人，寫字要求開始愈來愈嚴

有一次寫英文，功課派返嚟，一打開，成版功課幾乎都畫有紅圈。而當中圈嘅位係，佢唔對格，或者寫得唔好

小朋友都開始話：「媽媽，唔想寫啦，寫完老師都圈晒嘅」

小朋友嘅情緒低落，我好明白，其實學寫字都只不過係開始咗一段時間，而老師眼中嘅錯，可能係無寫喺個格仔內或者寫得衰，然而眼見成版紅圈咁派返嚟，又要重建佢學習嘅心，真係好難

再者，見於朋友圈中，post兒子被老師所圈咗嘅錯字，就問其他家長們：「到底個仔錯咗咩？」

大家忽然之間好似偵探上身……
「係咪係草花頭寫出咗？」
「定係下面個勾寫得唔明顯？」
「依個位係咪重筆呀？」

有時連家長都唔知錯咩，有時亦質疑所謂嘅「錯」真係錯？甚至質疑自己咁點去教個小朋友？

有人會話：「對比返個寫字app 就會搵到錯」

但如果真係咁易，點解個個家長都要好似金田一咁，研究自己小朋友邊個位錯？

做家長真係好矛盾，到底要小朋友先有學習動機，才做得好？定先做得好，才有學習動機？

圖片來源@試當真《豪哥演技大師班》截圖
讀者投稿@芝渣媽