#ParentLicenses2845

有日喺西隧轉930X，好多人排隊，我前面係一對父女

等車嗰幾分鐘，兩個都冇諗住拎定八達通。到上車先慢慢摷，後面成條隊陪佢一齊等。唔知嘅，仲以為張卡要即場申請

好啦，終於搵到，個細路女又拎住張卡亂咁嘟，嘟咗落信用卡嗰邊。個阿爸就企喺隔籬，完全冇打算幫手，淨係講：「唔係呢邊呀……」

係呀，唔係呢邊，咁你教佢嘟啱嗰邊吖嘛。後面成村人等緊，唔係等緊睇你個女自由探索

連司機都笑而不語，反咗個白眼。我就忍唔住講咗句：「玩夠未呀？」

個阿爸即刻發脾氣：「細路女係咁㗎啦，做咩要講粗口鬧人？」

吓？我幾時講過粗口？「玩夠未呀」四隻字，邊隻係粗口？你唔好自己加字幕喎

頭先幫個女嘟卡就慢慢嚟，有人出聲就即刻識俾反應。哦，原來唔係慢，係睇吓做咩

其實小朋友唔識嘟卡好正常，我都唔係要求佢出世就識搭巴士。但你做阿爸，見佢嘟錯，咪教佢、幫吓佢囉。阻住咁多人，講句「唔好意思」，成件事已經完全唔同

最怕就係一句「細路係咁㗎啦」，講到好似生咗個小朋友，全世界就有義務等埋你，仲唔可以出聲

小朋友唔識唔緊要，大人唔教先係問題。你今日教佢嘅，究竟係點搭巴士，定係阻住人之後，鬧返人就得？

生仔要唔要考牌我唔知，但唔好將「細路係咁」當成自己唔使教嘅理由

讀者投稿@ Peter Parker