#ParentLicenses2839

講下我媽啲經典語錄

我媽話點解生我呢，係因為當初嫁俾我爸之後有大量家務要做（佢奶奶即我阿嫲要佢做嘅），但佢唔想做，於是想盡快懷孕就唔使再做，就係咁嘅情況下生咗我（獨生女）

到我幾年前生咗小朋友，因我媽患長期病，預計情況只會每況愈下，咁佢班妹（即我幾個阿姨）就建議佢賣咗層樓，而我又賣咗層樓（我層樓無問我媽拎仼何錢），用呢兩筆錢買個大單位一齊住，等我可以照顧佢。點知佢一聽呢個建議就劈頭第一句同我講：「層樓遲早都係你㗎喇！」最後係無賣樓，繼續各自住

媽話佢部電話壞咗，叫我買部俾佢，咁都係買啲可打出打入最基本款。好記得嗰日打3號波，外面已經橫風橫雨，我買咗部棗紅色機拎去佢屋企。佢一見部電話第一句就話：乜隻色咁核突㗎！

細個去參加暑期班，因就遲到想行快幾步就俾佢拎把遮一嘢打落腳，仲話：「咁巴閉，飛過去吖笨！」

對其他人嚟講可能好小事，但對我嚟講呢幾句話係一世嘅刺

幾年前佢因病入院，有好一段時間我日日由屋企至醫院來回4個鐘去探佢，之後佢出院，但已行動不便就入咗護老院住。初頭一星期去探兩三次都唔睬我，就係因為由我送佢入護老院。幾年後嘅今日，我一星期去一次但已經唔想再去，好想諗返啲同媽嘅美好回憶去驅使自己繼續去探佢，但奈何真係諗唔到任何同佢嘅美好回憶

讀者投稿@ Kay