#ParentLicenses1369

我是一個BB出世幾日嘅超新手爸爸，仍在考牌中，希望咁多位前輩俾啲意見

話說，太太生完到出院後，我哋一家三口去咗外母（法定退休年齡，獨居）屋企度坐月，自此以後問題多籮籮，其中最多而難搞嘅係……

大家都知，香港夏天天氣酷熱，郁親都三十幾度，加上住緊高層向東南，外母已經成日都話好熱要開冷氣

我哋住咗入去後，每逢抱B出廳，外母都話要開冷氣。咁開咪開囉，同時間就幫BB著返長袖衫，又話驚佢熱親；如果BB係著緊短袖嘅，我哋就幫阿B加張冷氣被，外母又係話驚佢熱

我哋新手唔識嘢，上網睇過話摸BB手掌心同頸後可以知佢熱定涷。咁我間唔中摸下，我手感係微涼。我哋都有好正常咁同佢解釋返，但係無用（可能佢覺得我語氣差啩）

最躁嘅事係今朝發生。約凌晨4, 5點阿B先換完（爆）屎片，飲完奶，太太湊完瞓返。到7點左右，阿B喺牀度扭。我feel到佢應該都係再爆過，抱佢起身已經聞到陣味，咁我抱佢出廳換片，唔好嘈住太太瞓

出左房門，見到外母

佢問：「咩事？」

我話：「要換片」

佢話：「使唔使幫手？」

咁咪俾佢做（咁多日來，阿B嘅嘢就爭住做，太太坐月嘅嘢就好少理）

阿B爆屎嘅情況都幾多，有啲位都紅咗，佢就話陰功豬，好緊張

換完片之後，我抱返阿B坐咗近窗邊。當時天都光晒，但太陽未照入來，佢已經開口話：「使唔使開冷氣？」

外母要開冷氣嘅原因：
「天氣熱啊」
「三十幾度啊」
「阿B面又紅」（剛剛喺房，我睇住佢扭計郁身郁勢，應該好用力咁痾）
「下身又紅」（剛換片見到）
「背脊又紅」（沖涼時見到）
「人哋啲B都係全冷氣侍候」
「我錫阿B，驚佢熱親」

我同佢講：「阿B從來無出過汗，無開冷氣時，衫同頭都無濕過，手掌心後頸又唔熱」

叫佢試下摸又唔試，嗰一刻真係好想爆佢，但係我忍咗。佢講咗句：「阿B想婆婆餵奶」就返咗入房

有諗過搬返屋企兩個人自己湊返，但係又未坐完月，跟住因為8月新租約，7月要搬屋，屋企都立立亂，驚湊住B搬屋又兩頭唔到岸

P.S.：
希望各位唔好嫌棄我講到一舊舊??
另外，本人不願意其他地方轉載此文

讀者投稿@新手爸爸