#ParentLicenses2672

終於等到 #ParentLicenses2669 出，可以講下冬至發生咩事

冬至正日，屋企人喺姨媽度一齊食飯，今次我個妹同佢個仔冇嚟。席間提起我個妹，我又再講起佢兩母子冇嚟送別我兩個女，連喪禮都廢事去嘅事

啲啊姨姨媽嘅反應我都早就預咗，不外乎就係叫你：「算啦算啦！話晒都係你個妹」

都未夠，重幫佢搵晒藉口，例如可能忙、唔得閒、住得遠、個仔要返學等等嘅理由，但我媽居然一句聲都冇出過，淨係聽，好似我哋講緊嘅嗰個人佢完全唔識嘅咁樣

返到屋企越諗越唔忿氣，越諗就越覺得戥我兩個女唔抵，憑咩要我算數？點解算數嗰個要係我同我兩個女？我嗰個妹重要衰到一句問候都冇，扮下嘢話要嚟探我亦都冇，甚至乎之前我WhatsApp佢，叫佢還返條裙俾我都索性已讀不回

當晚，我就喺手機度搵返晒所有佢個仔喺度住嘅時候，有啲咩使費，要求我個妹即刻還返晒俾我。既然佢都冇將我當成家姐，又冇諗過要尊重我，咁點解我仍然要將佢當成細妹？佢個仔關我咩事？點解要我使錢？

扣減佢當年俾我嘅生活費，大概要還十萬多啲（已經有好多數冇計，因為我記唔起），就喺呢個時候我阿媽終於都出聲

啊媽：「你同阿妹提出嘅要求，要做出報復嘅說話，媽咪睇到心好痛」

續道：「你一世人得一個妹，你唔好咁對阿妹啦。媽咪求下你，媽咪同你講對唔住」

我：「點解到而家你都可以幫住佢？完全唔為我講一句公道說話？」

啊媽：「咁點呀？你要我講句公道說話，係咪要我斬死佢或者搵人整死佢兩母子，你就安樂？」

我完全唔能夠理解，我一世人得一個妹，乜我個妹唔係一世人得一個家姐咩？我兩個女臨死嗰陣，佢兩母子喺邊？我個女出事喺醫院嘅時候，我個妹喺邊？ 點解當時我阿媽又唔打電話同我個妹講佢一世人都係得一個家姐，要對我同我女好啲，尊重下我哋？

如果作為一個媽咪，連一個公道說話都唔識講，咁你學咩人生兩個？歸根究底，點解我個妹會咁唔尊重我？咪就係因為作為一個媽咪冇做好，永遠我哋有衝突嘅時候，都要我遷就，要我退讓；永遠佢有麻煩嘅時候，都要我善後：到我要強硬起嚟嘅時候，就情緒勒索或者道德綁架我！咁樣我個妹咪永遠都唔使俾面我囉

成日淨係識得同我講「手背又係肉，手心又係肉」，我完全諗唔明點解會妨礙到佢為我講一句公道說話。我媽而家可以為咗佢嚟話我，話我唔應該點點點對個妹，但係又唔可以為咗我去話返佢，話佢唔應該連家姐個女嘅送別儀式同見最後一面都唔去

生仔真係要考牌，如果你認為自己唔係一個公平嘅人，或者唔識點樣去公平對待兩個小朋友，咁你就唔好學人生兩個！

讀者投稿@大大大大姨媽