#ParentLicenses2657

話說早前我哋喺同月媽媽群就搞咗個聚會，有位媽媽（下稱S）拎咗我哋訂場資料之後，就話不如由佢去問下有無贊助。但直到聚會活動當日，S從無提及呢件事，亦無拎任何嘢出嚟

聚會完結後隔咗段時間，有媽媽傾起始覺得奇怪，於是就私下問佢有無申請到贊助禮物。S回答話其實有申請到，只不過當日就唔記得拎出嚟

擺明係拎咗禮物想扮晒嘢唔講

被揭發之後，S突然好主動喺聚會群組提出話有贊助，禮物係一支消毒噴霧（總數量、詳情乜都唔講），問其他媽媽會唔會要返，如果要嘅就每人俾返運費

後來我哋發現，件貨係順豐送去佢屋企，但BB聚會嘅場地與提供禮物嘅贊助商嘅地址只係一街之隔。喺聚會前，S係完全無問過我哋有冇人拎到、大家夾唔夾運費等等，就私下叫贊助商直接順豐送去佢屋企

當大家都知道咗呢件事，媽媽們就問S點樣約時間可以拎返啲消毒噴霧，佢就開始嚟料啦！佢話幾時得閒會通知我哋，呢排好忙，冇時間約，順豐上門收又話唔得，於是大家諗住少少禮物仔等下都無所謂。卒之，就等咗S足足兩個星期，突然發現S退出所有谷，同時封鎖晒我哋廿幾個媽媽

我哋打電話過去，佢聽咗之後即刻cut線。於是我哋去其他群組問有冇人識佢，佢就即刻解除封鎖某幾個，話自己唔會貪呢幾十蚊云云。當再約佢交收，佢都係唔俾期我哋，即使佢話可能要半夜先得閒，我哋亦提議去到佢樓下無論幾多點我哋都可以，佢就推搪話屋企無人，同埋唔知自己幾時喺屋企

S藉口連連，根本由頭到尾想博我哋唔拎，佢就袋晒

後來，S就提出要我哋俾返佢當初贊助商送貨去佢屋企收貨嘅運費（運費$120），反指責我哋態度差所以唔想理我哋，更強調自己冇封鎖我哋（其實我哋有截圖證明佢係解封完之後扮自己冇封鎖，因為就算解封後之前嘅對話都係單剔）。另外，有其他識佢嘅媽媽話佢有前科，拎咗人哋嘅包尿片唔還，一樣話冇時間，話唔會貪呢啲平嘢，但最後都搵唔到佢

而家就進展到間舖頭話回收返啲禮物，佢都拒絕拎返禮物出嚟，堅持要其他媽媽俾返之前產生嘅$120運費，要收咗錢先肯俾間舖頭上門收返禮物

讀者投稿@李小姐