#ParentLicenses2656

影呢張相嘅時間係星期日嘅傍晚時分五點五十分，即係差唔多六點，係大部份人嘅放工或者出街食飯嘅時間

喺呢個咁繁忙嘅時間，居然有個年輕呀媽連同兩個年輕女性朋友，推住架咁大架嘅BB車，目測BB車內嘅小朋友大舊過我個仔，估計冇六七歲都有五六歲
.
進入正題

當時係一齊坐屯馬線到鑽石山站落車，喺咁乸多人轉車嘅站，佢居然推埋架車去搭扶手電梯！？

BB車內嘅小朋友仍然熟睡當中，啲手手腳腳叉晒出嚟，架車重要掛咗書包、大支水、雜物等等，架車一定有返咁上下重量

而後面就有成邨人搭扶手電梯，兩邊都企滿人，試想想，如果架車有咩事上唔到去，例如撠住，相信後面全部人都會人疊人咁碌晒落嚟，全部人同你陪葬，全部人同你搵命博！

我知有人實講呢句：「可能人哋小朋友有需要坐車呢？」

我冇否定小朋友係咪有需要坐車，但係咪真係要自私到罔顧他人生命安全呢？成日都有廣播叫人拎住大型行李同手推車都要搭𨋢啦，何況係咁大個「大型巨嬰車」呢？如果咁趕時間，不如你叫小朋友起身落地行唔好瞓啦，拎返啲手腳出嚟唔好周圍叉啦，一陣有咩意外屈到手腳又會賴邊個呀？

轉車後，巧合地又喺同一卡車，年輕呀媽操控住架咁大部BB車都冇意識要推入啲，佢身邊又有兩個朋友圍住佢開開心心咁吹水，小朋友仍然繼續熟睡，令全部乘客想出入都行唔到，趕落車嘅乘客就一仆一碌、一左一右咁撞到佢，最後佢先行入啲

大佬呀，你唔係唔知港鐵呢啲時間閂門都閂得急呀？最諷刺係嗰啲乘客重同佢講「唔好意思」，佢應返人哋「唔緊要」，其實你好唔好意思講「唔緊要」呢？而家係你為咗方便自己逼所有乘客遷就你喎

如果小朋友真係咁有需要，三個大人不如去搭的士？如果唔想搭的士，不如遵守吓交通禮儀？不如三個人一齊用下個腦諗下自己同埋你哋位朋友係咪自撚私，甚至佢嘅行為有機會累死人？

大家都做家長，理應具備同理心，如非必要都唔想多加評論，我一樣有個差唔多大嘅小朋友，佢四歲已經唔再坐BB車，因為佢無身體障礙，而我相信佢係有能力自己行，如果真係覺得攰我會抱一陣，或者搵個地方俾佢坐休息吓，甚至乎坐的士返屋企，都唔會依賴咗架BB車，就算去旅行都唔會因為咁帶BB車

我亦從來都唔會話啲大BB重要坐車，或者大BB去旅行都要坐車，因為世界上係有好多肉眼睇唔出嘅需要，或者體能真係冇咁好，始終每個人都有佢哋自己嘅難處，但我相信大家有品、有腦嘅，都唔會為咗方便自己做出啲咁自私嘅行為，推架巨嬰車搭扶手電梯吧？

呢張唯一嘅相我係刻意影低啲嘅，希望盡量唔好影到無關係嘅人，如果需要請Admin幫忙打格🙏🏻

我想表達出嘅係，既然身邊冇人去教你咩叫安全意識，冇人教你身教，咁唯有由社會去教你吧

相片來源@沉睡的巨嬰
讀者投稿@沉睡的巨嬰