#ParentLicenses2652

而家啲人成日講「生仔要考牌」，相反啲媽媽出嚟反怪班路人唔體諒，引起對立。咁大家口中嘅「要考牌」，其實係期望個持牌者識啲咩呢？

咁啱呢兩個星期分別遇到兩個媽媽，類似事件下，佢哋嘅處理手法令我覺得一個有牌，另一個就需要去考牌，所以想同大家分享下

話說十月廿五日，喺港島東地鐵入面遇到一個媽媽，佢抱住一個目測約為三歲嘅小朋友，有外傭陪住。小朋友突然間係咁喊，喊咗一個站，個媽媽開頭都無咩應佢，之後先研究係因咩事係咁喊。可能係無俾iPhone？條頸有嘢咬？其實個呀媽係咁講，個細路都淨係喊，而且開始好擾攘。就係咁，到下一個站，呀媽抱住細路同外傭落咗車

再到上星期十月十九日，喺九龍東區坐綠色小巴，一個媽媽帶住一個目測七歲左右嘅女仔。甫上車，個女仔已經係咁唱歌，而佢唱嘅內容係《啦啦啦》。其實已經好滋擾，好多乘客有望過去，但個呀媽就係好欣賞咁望住呀女，呀女亦無停止嘅意思

未幾，有個呀嬸拎轉頭望佢，而另一位乘客話：「Seriously？！」呀嬸見有人出咗聲就拎返個頭望前面，個女仔同時停咗一停。我以為可以遠離呢個難頂嘅聲音污染啦，點知個女仔出聲話：「I just wanna sing.」個女仔想繼續唱，今次多咗乘客有反應，個女仔終於肯靜落嚟

其實喺我眼中，有無牌嘅意思指你哋既然決定生個小生命出嚟，願唔願意或識唔識去處理個小生命製造出嚟嘅問題。當然處理手法無可能下下都好似教科書咁，但至少你哋有無呢個意識，而唔係下下用「開放教育」「自由成長」去掩飾自己嘅不負責任同對育兒上嘅無知。好多家長好鍾意一嚟就一句「係人都知細路係會嘈㗎啦，確實係人都知細路會嘈，但你哋又知唔知，只要家長願意學，其實係有方法可以處理到小朋友嘅行為問題呢？

讀者投稿@道德高地地主