#ParentLicenses1468

喺社會上，人與人之間就算唔識都好，要學識互相尊重，小學常識堂都有教啦！

件事好簡單，話說今日成35度，熱辣辣，行到身水身汗，見到有雪糕車就即刻行去買返枝甜筒食

天氣咁熱，雪糕車梗係多人排隊買啦，就係等梗期間，有個小朋友好大聲咁指住架雪糕車話：「媽咪我想食雪糕呀！」

跟住嘅對話真係無敵

無禮貌女士（即係個小朋友呀媽）高8度回應：「雪糕車啲雪糕好污糟㗎，唔好食依啲垃圾，一陣你乖就買啲靚嘅雪糕畀你啦」

我聽完打咗個突，咁講究衛生？其實出嚟食嘢都係眼不見為淨啦

當然，理性咁講，依樣嘢無可否認，雪糕車嘅雪糕可能喺溫度上做唔到喺超市或雪糕專門店咁凍，相信係有機會滋生細菌（如果有錯請指正）

但係喺人哋客人面前話人哋啲雪糕係「垃圾」，又話咩「靚啲嘅雪糕」，你識唔識「尊重」兩個字點解？你唔買可以行開，但唔需要咁講嘢啩！？

就係啲咁嘅呀媽教到啲小朋友目中無人、自我中心、唔理人感受

讀者投稿@其實教個小朋友要識尊重人唔難