#ParentLicenses1467

睇到關於電子奶嘴嘅投稿，呢樣嘢之前都幾困擾我，所以希望投稿嚟分享一下自己嘅感受

先講明一點，從投稿者嘅字裏行間，我感受到佢唔係批鬥使用電子?嘴嘅家長，只係唏噓電子奶嘴會取代親子時光

我都好欣賞投稿者呢份心思，不過始終每個小朋友都真係唔同

另外，由於一提到自己嘅寶貝B，我就好多嘢講，所以文章非常長，希望讀者唔好介意

因為有好多研究指出睇電子?嘴嘅壞處，所以我喺小朋友出世前至出世初期都遠離電子奶嘴，而且初初帶小朋友外出時，我只會帶好多玩具同布布書

事與願違，每一次佢喺BB車入面都唔會理啲玩具，只係會周圍望，然後就係尖叫同不停用手拍自己個頭

我諗佢大概係驚陌生環境，而且都未坐得穩（當時已一歲及排咗期見醫生），所以我就唔用BB車，用手抱

小朋友十次有十次都仲係會坐唔夠十分鐘就尖叫；若果唔盡快離坐，佢更加會撞自己個頭落枱，於是我就索性唔出街食飯

直到小朋友歲半時，確診咗係特殊兒童，每星期要由新界北嘅屋企出發去九龍嘅治療中心兩至三次

我小朋友喺搭車時都同入餐廳有同一個情況——會尖叫同打自己

佢尖叫係因為驚，驚到失控。其實我都唔明佢點解會驚，有時係驚啲聲，有時係驚啲光，有時見車門閂而驚，有時亦可以因為睇唔到車門而驚

我當時嘅經濟情況係唔容許我每個月搭十次長途的士，只好硬著頭皮，預早幾倍時間出門

點解？

因為每當佢喺車廂內尖叫，或者意識到佢將會開始失控，無論係乜嘢原因，我都會先帶小朋友落車，出返月台等佢冷靜

除咗因為佢尖叫時非常影響其他乘客之外，亦因為喺嗰個情況下，最有效嘅方法，就係帶佢離開佢恐懼嘅環境

如是者，本身只需要一小時嘅車程，因為帶著小朋友又上又落，都延長至搭到短途機

好彩，我係全職媽咪，所以有咁嘅時間，不過同時又衍生咗另一個問題，就係我哋趕唔切返屋企食飯

小朋友依舊去唔到餐廳，所以我就外賣去附近嘅公園食，反正推BB車入餐廳都唔方便（佢當時識坐，但未識行），所以喺公園食都唔錯

「好景」不常，因為後來嘅疫情，公園被封鎖，唯有又再嘗試帶佢去餐廳，不過情況依舊係咁

偶然間，我發現電子奶嘴可以轉移佢嘅注意力，當中細聲嘅音樂，加上畫面嘅閃動，的確能夠令佢投入咗去一個佢覺得安全嘅世界

根據唔少研究都指出，螢幕嘅光線同畫面嘅高速閃動會引發好多壞處，諷刺嘅係，因為呢啲特徵反而先可以激發到我小朋友嘅專注力

我初初嘅心情好矛盾，直至同治療師商量後，就決定用電子奶嘴，權衡好處係除咗唔使餓半日之外，仲藉此讓小朋友適應喺餐廳進食

長遠目標就係由依靠電子奶嘴，到等佢自己明白無嘢會傷害到佢為止

於是乎，望落似3, 4歲嘅囝囝（佢偏高，瘦，望落係唔似兩歲）就一邊望住個電子奶嘴，一邊由我餵食（佢當時嘅小肌肉仍有待改善）

有時，隔離枱食客係會投以不屑嘅目光，好彩小朋友根本唔會知；亦有時，好心嘅旁人會提醒「你唔應該咁做」

由於對方出於好意，我又唔介意俾人知道小朋友嘅情況，所以都會略略簡述點解咁做，暫時遇過嘅回應有兩種：

一、對方明白，嘆息，我又會講吓正常小朋友都有照顧上嘅煩惱，然後我哋講句一齊加油

二、對方覺得所謂特殊情況只係縱容嘅藉口，分享自己嘅經驗，然後我笑笑，專注返去餵囝囝

我小朋友快3歲了，食飯都仲係會用電子奶嘴，偶爾會鎮靜咁觀察四周環境，唔會再全程都只係望實個螢幕。而且唔再淨係睇片，都會玩吓啲關於言語治療同感觀統合嘅apps

當然，可能我係個別例子，並唔係每個用電子奶嘴嘅情況都有特別原因，更可能只係家長單純唔想煩而已

家長唔想喺哩方面煩，可能因為佢本身已經有好多苦惱，不勝負荷，所以寧願舒舒服服食餐飯去緩和自己嘅情緒

再者，唔係每位家長都唔介意透露自己小朋友嘅狀況，相信就算透露咗都未必得到理解

我相信大部份家長都會自己去衡量點樣嘅照顧係整體良好，始終喺哩個年代仲選擇要小朋友，都好少再諗住天生天養

我希望大家對於旁人照顧小朋友嘅方法都無謂太執著（當然影響到人就另計，而牽涉到虐兒嘅情況就更要挺身而出），社會環境已經壓抑，無奈嘅事已經好多，唯有凡事睇開啲，咁就對自己同值得愛錫嘅屋企人都好啲

Viutv節目截圖@七救星
讀者投稿@F.M.