#ParentLicenses2637

話說同區某Y_M傳統官小係好搶手，當初揀學校啲媽媽聽到我完全無揀呢間入頭三志願都話我傻，但我知自己小朋友咩料，唔想佢太谷太辛苦

自小一開咗學之後，搭巴士返學時，經常同呢間官小啲學生同車，見識到啲學生同家長後，真心慶幸我無幫個女揀呢間

除咗巴士親子大聲傾計、溫書好似係例牌咁之外，細路上車爭先恐後，明明排人後面，架車人多拍完卡排緊入去，都可以夾硬攝上嚟搵位都夠膽死

而今日就有對母女坐我對面，其實我一坐低都瞓，但無奈佢兩位真係未停過。因為太嘈我瞓唔到時就望到佢阿媽，眼看佢嘅「無微不至」令我真係自愧不如

個阿媽全程好似妹仔咁服侍個女，當個女要咩，佢就喺書包變咩出嚟。我聽到小朋友係讀緊三年班，但仍然要佢阿媽執佢隻腳上阿媽膝頭幫佢整鞋，整足一對，而小朋友自己就佗佗佻佻喺度睇書，之後又紮頭髮又搞呢樣嗰樣搞到落車

最抵死嘅係，我同佢哋對頭坐，喺乘車中段太攰又恰返埋眼時，俾佢小朋友踢咗一腳。因為啱啱佢哋先靜啲，我可以瞓返之際，佢女就踢埋嚟，令我有啲燥燥地，所以我「㗩」咗聲

最厲害係佢老母聽到我「㗩」，就好緊張咁問個女：「你整到人呀？」

佢個女好若無其事咁應咗聲：「係呀～」

然後，就沒有然後了

我心諗：咁都得？咩教育呀大佬？我個女整到人，我做老母都即刻同人道歉先啦，個女唔識出聲都教佢要即時同人道歉，你哋完全當無事發生咁有趣嘅？咁個老母緊張嗰下係做咩？緊張我整到你個女呀？

落車之後我女問我有無事，佢應該無瞓睇到我被人踢到，我話無事，同時好擔心我女會唔會羨慕人哋有呢啲「星級服務」。好彩佢都知呢啲整鞋、執書包嘅事情，咁大個應該要自己做，同時都有問點解姐姐整到我唔道歉，如果唔係我都要再去考牌

學校教唔好，家長又無牌，學校成績幾好都無用啦。呢個世界唔係淨係得成績，揀學校真係唔好盲從

讀者投稿@巴士乘客