#ParentLicenses2628

今日同屋企人行街，我推住BB車，有個五六歲嘅細路喺我架BB車前穿穿插插，佢手上揈下揈下舊好似搖搖咁嘅玩具

由於地方好窄，佢個搖搖差唔多打到我小朋友塊面。我小朋友係歲幾人仔，一嚿飯咁嗰啲。

我即時停低架車想等佢先過，但係佢又冇過，又停咗喺度揈個搖搖。因為我自己都有個五歲幾六歲嘅小朋友，我好明白佢哋呢個歲數唔識睇，唔識判斷身邊嘅人同事係好正常，所以我完全冇鬧佢，亦都冇用一種責備佢嘅口吻，只係好平淡咁同佢講咗兩次「小心」

殊不知只係行開咗幾步，隨即就聽到佢老竇好大聲咁用粗口講：「咁X驚，唔好帶佢出街！」

我聽到佢咁講，我即刻回應佢話：「你可唔可以講吓道理？我都冇鬧你個小朋友，使唔使咁樣講嘢？」

個渣男嘅老婆就即刻衝出嚟講：「我會叫佢唔好再咁做」

我回應佢老婆：「其實咁樣講一句咪得囉，同埋我唔覺得你小朋友有問題。成件事有問題嗰個係你老公！」

真係「一樣米養百樣人」，其實真係好小事，個細路亦都冇整到我小朋友，但係咁無恥嘅家長我真係第一次見，祝嗰個小朋友喺啲咁樣嘅家教，咁樣嘅環境之下成長，將來依然能夠做一個正正直直且挺得起胸膛，值得人基本尊重嘅男人

相片來源@超速搖搖
讀者投稿@西頁陳師奶