#ParentLicenses2615

尋日落樓拗柴，因為痛得好緊要，隔幾條街有間跌打，咁近又唔想飛的，所以就俾幾蚊喺樓下搭巴士搭兩個站算

當我一上車就得返關愛座，拗柴又冇理由上樓上，諗住兩個站好快落就坐住先，點知就喺下一個站有個阿媽抱住小朋友上車

個阿媽隨即叫我讓座：「你見唔見到我抱住個女？」

我：「Miss，唔好意思，我啱啱拗柴，或者你問下其他乘客可唔可以讓俾你？」

Miss：「我睇唔到你隻腳有事，唔需要俾籍口我」

我：「我下個站落車，到時俾你坐好冇？」

Miss：「講咁多廢話，唔想讓咪直接講囉」

結果有個阿叔起身話：「讓俾你囉臭＿！人哋拗柴已經好痛，重要聽你啲說話」

Miss：「咩話，你話我咩呀？臭咩嘢呀？」

霸氣阿叔：「坐唔坐呀？講咁多廢話，唔坐咪直接講囉」

我哋俾啲掌聲阿叔👏🏻👏🏻👏🏻

讀者投稿@拗柴哥