#ParentLicenses2609

早前喺書展排隊輪候作者簽名，由於該作者除咗簽名之餘，佢都會幫每位讀者畫畫，所以都排得比較耐。當時排我前面嘅係一家三口，個女靜靜地喺度睇下書、玩下電話打發時間，都幾乖嘅

點知突然有一位母親帶住兩個女同一個坐住BB車嘅仔埋嚟，破壞咗呢度嘅寧靜。見佢同排緊隊嘅一家三口傾偈，估計佢哋係兩個相識嘅家庭。本身我哋條龍係靠牆排嘅，而佢哋人多又加埋BB車咁，已經阻到出路中心，加上呢幾個小朋友每人手上都玩緊一個唔知邊度派俾佢哋嘅汽球，拋上又拋落，有幾次汽球差啲跌向我

書商嘅工作人員見狀已經不時提醒佢哋唔好咁玩，以免衝去接波嘅時候撞到途人，但小朋友當然係當耳邊風啦。佢哋嘅母親亦都無加以阻止，甚至留低啲小朋友俾排緊隊嘅家庭幫手睇住，自己行咗去睇其他嘢。後來，佢返到嚟見到其中一個女坐咗喺地下，就大聲鬧個女，話地下好多菌、條褲又短、好污糟云云，著佢起身，但個女都係唔聽

之後佢帶埋仔女一齊行開去睇嘢，以為咁就完咩？錯喇！

無幾耐有個男人捧住個裝滿食物嘅托盤埋嚟，問排緊隊嘅家庭：「佢哋呢？」

排隊父：「唔知喎，你call佢哋吖」

從佢哋對話，估計托盤男就係三個玩波小朋友嘅父親，買完食物返嚟又唔知佢哋行咗去邊，就四圍搵佢哋

以為佢哋會匯合一齊去用餐區食嘢？咁就錯喇！

托盤男搵返老婆同三個仔女返番嚟呢度，就開起餐上嚟。佢哋企喺路中心，全程由托盤男揸住個托盤，再用叉拮啲燒賣、腸粉分俾啲仔女食，惟佢哋完全唔覺得自己阻路或影響到其他人

隨後，其中一個女伸手去托盤攞個雞批，就俾母親喝住：「你食得晒一個咩？留返啲俾我呀！」

個女無反應，母親繼續喝：「好吖，咁你成個隊晒佢呀！」

總之每食一樣嘢都有爭執，一時又鬧個仔：「你唔食腸粉吖嘛，無呀！全部都係黑色㗎（有豉油），無白色腸粉呀！」「魚蛋辣呀，你唔食得呀！」

食完啲仔女都夠飽（又或佢覺得啲仔女未飽），就鬧托盤男：「做咩唔買個飯啫？食飯一定會飽吖嘛！」

之後，佢哋就係咁喺一片吵鬧聲之中遠去。但你以為佢哋就咁走咗？又錯喇！

無幾耐托盤男又捧住托盤返嚟，今次係一大隻糯米雞（唔係細隻嗰啲珍珠雞）。但我諗佢啲小朋友開始飽喇，對糯米雞無乜興趣，又開始拋汽球，汽球有時跌落裝住食物嘅托盤，當然又鬧啦。汽球有時跌落地下，又鬧「污糟呀」「有菌呀」，再鬧埋「最憎人派汽球」（心諗人哋派你可以唔攞嘅啫）

其實書商每次有唔同嘅工作人員行過，都睇唔過眼條隊排到凸晒出路中心而出聲，但呢家人每次都話自己「我哋唔係排隊㗎，等人㗎咋」，工作人員都無佢哋符，結果係要等到排簽名嗰一家三口簽完，佢哋先至肯走

讀者投稿@一名毒者