#ParentLicenses2593

今年我都三十幾歲，喺好耐之前識咗個年紀細過我嘅女仔，當其時已經見到佢有一個重係坐緊BB車嘅BB

前幾個月，我喺商場門口撞返呢個女仔，原來佢搬咗去同我同一齊住嘅屋苑。咁多年冇見大家都講返近況，始知道佢又生咗另一個小朋友。喺談話內容得知道佢原來同佢之前嘅老公分開咗，但係目前而家個BB係同之前嗰個男人生嘅。其實佢個女嘅出現都好似佢之前嘅男朋友咁樣中出即飛或有咗第二個女人。佢同我分享後，我都見怪不怪，因為每一次都係咁樣重重複複

其實我覺得佢份人比較隨便，本身着得性感、暴露，簡言之係唔識得保護自己，更唔識得照顧小朋友。佢自己本身係食煙，好多人都勸過有小朋友就唔好食煙，既影響自己，又影響小朋友成長，但佢就表示：「戒煙唔係你咁樣諗咁容易」

前日佢就不斷喺度同我呻下自己每日湊小朋友幾辛苦又好煩。小朋友本身係比較活潑同埋好多嘢講又跳跳紮，呢個都唔係問題，個問題就係佢自己本身冇返工冇收入，一係靠朋友借錢，一係靠社福機構嗰每個月二千幾蚊嘅津貼。其實生得小朋友都知道要學費、尿片、奶粉錢、車錢、生活費、食嘢費等等，樣樣都係錢，但係偏偏佢每次出街都係去買煙食

都係嗰句啦，我覺得照顧小朋友真係唔係好容易，加上自己嘅經濟能力俾唔俾到個良好條件小朋友，重有知道自己嘅情緒病要食藥，自己都唔做避孕措施，要怪都怪自己蠢，咁容易俾人呃！

讀者投稿@Hi1234