#ParentLicenses2577

我有一個三歲半嘅小朋友，今日發生兩件小事令我都覺得自己要考牌

第一件事係喺反斗城呢個「魔窟」行街時發生。可能因為係連續假期，所以魔窟內無乜人。我個仔排好隊去玩一件佈滿傢俬嘅玩具屋，玩法主要係放返傢俬上去。坦白說，趣味有啲欠奉，我係非常想離開

我仔排隊之時後面係無人，突然有個年約K3至小學嘅小朋友跑咗過嚟，佢貼到我仔實一實咁，無出任何聲就「一齊玩」

我都講咗聲：「細佬玩緊，要玩就要排隊啦」

然而，個小朋友無甚反應，望一望我就再伸手去玩

我再講多次：「不如你排隊啦」

佢隨即再用身體推開我個仔，我就忍唔住抱返住個仔話：「要玩唔該要排隊啦」

係呢個時候就有個老母跳出嚟話：「使唔使咁惡丫，係唔係要教下小朋友分享丫」之後就走咗

屌，我真係嬲嬲地，被人搶嘢玩，再被人挑機情緒勒索叫我分享？香港人自己無時無刻都真係大支嘢啲嫁喎

但我都要反省下，我應該早早就叫個仔離開或者努力啲，試下用其他方法去解決，等佢唔再需要喺個魔窟同班小朋友一齊搶

第二件事係喺地鐵站時發生。當時我個仔跑咗去，衝咗去一間蛋糕店。我已經追到氣咳，突然見到有個年約K2至K3嘅小朋友追住我個仔隻鞋嚟踩

我見個小朋友都追咗我仔成分鐘，我就問佢：「踩夠未？做乜踩我個仔？」

或許係我太大聲唔啱，立即嚇到個小朋友貼實佢阿媽。喺嗰時我先知係好似我個仔跑過去蛋糕店時踩到個哥哥（但只係個K2至K3嘅小朋友單方面解釋）。 我立即問我個仔有無踩到人，如果有做就要道歉講對唔住。但我個仔無理我，繼續睇蛋糕

呢個位我都真係唔好意思嚇親個小朋友，但如果個仔被人追住嚟打（踩），我好想知我到底可以點樣先忍到同好冷靜去解決件事

讀者投稿@Rory