#ParentLicenses2560

有一個客人於某食店群組指出見到某分店有流浪漢，續說唔知個流浪漢坐過邊張枱，佢覺得污糟，所以以後唔會在該店堂食

其實呢，唔止流浪漢囉

小朋友唔夠高食嘢，就會企上座位上，佢哋啲鞋底踩過幾多篤痰和狗屎，你係唔會知。而我只係知，啲清潔工見唔到明顯污糟就唔會抹座位，一般都係只會抹枱

我今日在另一家新開食店食嘢，我坐近牆二人枱的梳化位。當時旁邊係四人枱，坐著一對父母和約為四歲的妹妹。妹妹坐我左邊相隔一尺，佢唔夠高望唔到枱面，而嘢食又未到，相信佢感到好悶，遂唔除鞋，就咁成對腳放上梳化踩。直到坐返低時，對腳平躺梳化上，鞋底向住我伸直對腳。好彩嘅係我同佢對鞋仍有一尺距離，否則我早就鬧臭佢家長

對父母有心教女嘅，老豆有截住個女唔俾佢推跌張枱，因為到了爸爸份湯麵，可能真係會構成危險，所以老豆有好惡咁鬧佢

然而，媽媽抱小朋友反而係由得對腳鞋底向住外人，呢啲真係自私家庭先至做到。個阿媽似乎冇意識問職員攞兒童櫈，定係食店太新，所以根本冇兒童座椅呢？唔知。

講到尾，出街預咗冇屋企咁舒服乾淨，如果真係介意，一係外賣，一係叫職員抹，一係就自己抹。我就嗱嗱臨快啲食完快啲走，費事佢踼到我

如果小朋友對鞋直接整到我，我真係覺得係家長的責任！有小朋友唔係大晒，佢坐唔定得兩個方法，一係即時教，一係唔好帶佢出嚟攻擊無辜的人

讀者投稿@唔生仔有原因