#ParentLicenses2549

去文化中心睇《羅密歐與茱麗葉》，張飛寫明六歲以下恕不招待，但唔知點解見到唔少明顯未滿六歲嘅小朋友入場

呢個表演係用法語演出，配以中英文字幕，而且表演需時足足三個鐘，中間有一次中場休息。咁事實上呢個劇目唔算係適合兒童，莫講話六歲，就算八九歲嗰啲小朋友都係聽唔明、睇唔明，所以就悶到講嘢、問大人十萬個為什麼、踢櫈、爬上家長度瞓覺、中途離場等等情況不勝枚舉，對其他觀眾好滋擾

呢啲我都忍喇，「他只是個孩子」吖嘛。惟更攞命嘅係，因為適逢母親節，所以入場時有派發獨立包裝嘅單支玫瑰，等小朋友可以送俾母親們，所以幾乎個個家庭都有一支花帶入場。我全場三個鐘就係聽到前後左右有好多個小朋友輪流因無聊而狂搓玫瑰包裝膠袋嘅噪音，嘈到令我冇辦法欣賞音樂

平時用膠袋可能唔會覺得好嘈，但音樂廳裡面，大家安安靜靜睇劇時，啲膠袋聲就顯得好刺耳。請問係邊個咁聰明諗到派膠袋花俾人帶入場睇歌劇㗎？

其實香港係有兒童音樂劇，適合一家大小一齊大聲笑住去睇，帶小朋友睇呢類輕鬆搞笑嘅咪好囉，求求大家唔好嚟搞咁淒美嘅《羅密歐與茱麗葉》啦?

圖片來源@STUFF
讀者投稿@豬麗葉