#ParentLicenses2530

有時啲人攞小朋友來比較好平常，例如會問上緊乜興趣班、補習班，讀緊邊間幼稚園，想去邊間理想小學，理想人生係點，甚至會比較身高、體重等等。但同樣比較喺親戚之間發生，然後就會被暗笑、質疑同責怪，彷彿一切都好似只當係閒話家常

有一次親戚聚會中，一位較年長嘅親戚甲帶點質疑地問我：「乜你女讀幼稚園唔使俾錢咩？點解我孫要俾錢？我仔話幼稚園要俾學費讀」

我心諗：「你真唔知定假唔知？有學券好耐」

之後輪到親戚乙講起香港樓市情況，冇咗壓力測試乜乜柒柒，唔買就蝕云云。分析完就同我講：「你住公屋只會教你個女住公屋，第時你個女就怨你唔幫佢上車」，乙再講到識人幫到手入名牌幼稚園，學費要過萬

我個下真係心有戚戚焉。係，雖然我住公屋，個女讀村幼，但作為全職媽咪，上有高堂要照顧，講真，要買樓對我並唔容易

不過我冇氣力向佢解釋，因為親戚乙並唔係一個母親，大家嘅立場身份完全唔同，佢係唔會明白全職媽咪嘅難處，惟自己同自己講：「佢講之嘛，佢冇責任嘅，或者想激勵下我呢？」

而親戚丙每次見面都會話：「嘩！做乜你女咁瘦，你有冇俾飽飯佢食？係咪唔吸收」「您睇表妹仔食唔停，身型又高，最近重要考到乜乜（名幼）插班」「做乜你唔請個姐姐湊女？你女而家學緊乜嘢興趣班？有冇補習？您女間幼稚園重未教呢啲？您啲興趣班咁平得唔得？」

有時重會玩度高、磅重，我就嚟要寫份report俾佢

親戚丙盤問完後，佢就會叫表妹仔將一系列「天才」能力表演出來，但到我女表演時（我同我老公死忠咁出聲出力拍掌我女先OK），佢哋就走開晒囉

最後我選擇同佢哋減少見面，朋友可以選擇，但親戚冇。

小朋友開始大，佢會問返我：「點解佢哋會咁問？」

我答我女：「係，耐冇見，想知你近況囉」

我女答：「但佢考我數學噃」

我答：「咁你識咪答，唔識就答佢唔識」

我真心無奈，作為父母嘅我只係想搵到適合嘅嘢俾小朋友，選擇陪伴佢多啲。我有時想「佛系」啲，亦有時想進取啲，但我唔需要向你哋交代咁多！冇比較冇傷害！

呻完舒服曬，寄望大家一起健康成長，要爭氣！

讀者投稿@窮L全職港媽