#ParentLicenses2495

我同老公拍拖七年結婚十一年，好唔好彩佢屋企係一個福建大家庭，由拍拖開始每次見面就提結婚，結咗婚後每次見面就催生仔

每次有飯聚嘅時候，當成枱坐滿晒福建人後，恐怖時刻就會隨之而來。奶奶會打開話題問幾時生，之後呢個種族就會展示好強嘅團結力量，三姑六婆會開始對我輪流攻擊。我叫佢哋「唔好再講」「安排當中」「順其自然」等等，但咁都唔得，佢哋唔理我回應內容，見我面色越唔好，佢哋就會講得越興奮

其實我係唔想生多過生，但又無話一定唔會生，不過唔會係當時嘅事。我老公有五個兄弟姊妹，佢係排行最細，所以我要睇晒佢哋所有屋企人臉色。我平時嘅處理就係唔出聲、無表情，希望可以講到少講少錯。然而，我發現每次跟佢哋屋企人見面嘅時候，個個都會清楚我哋嘅近況，咁樣係証明咗佢有喺我背後講我事非啦

就係咁過咗十一年，當結婚踏入第八年嘅時候，我生理同心理準備充足時生咗第一個仔。我以為從此就可以喺佢屋企面前抬起頭做人，但原來係相反，原來反而係令我咁多年放喺心入面嘅鬱結一次過爆發，例如唔鐘意佢接觸我個仔，唔認同佢教仔嘅方式，甚至係遇到每一次教仔不順心時就會諗起班福建

佢哋雖然而家無再講，但我發現我有心理陰影，只要諗起我老公都係福建人，我個仔係半個福建人就好嬲。喺憤怒嘅狀態下，已經影響咗我日常生活。我同個仔關係好好，我哋兩個好愛錫佢，佢都好乖，一家人表面睇上去係好幸福好美滿，但實情係我同老公關係好差（因為當年佢屋企人催生時，佢只係坐喺度袖手旁觀）

每次諗起都會嬲，我唔知道要點樣放低

讀者投稿@Wyc