#ParentLicenses2484

希望天下嘅父母都可以教小朋友成為一個有愛心嘅人，世界先會變好

今日喺北角城市花園嘅細遊樂場遇見兩兄弟（我估年約四至六歲），同一位妹妹踎咗喺地下

當時地上有三隻白鴿，而兩兄弟各手持一架車仔，佢哋竟然用架車仔撞向啲鴿，但啲鴿可能肥得滯無走到

身邊嘅妹妹仔隨即就話：「唔好咁樣啦」（我相信佢哋並非屬同一個家庭），但佢哋仍然再車多次過去。卒之架車仔撞到隻鴿，隻鴿就急急腳走開

我上前叫小朋友唔好咁做，唔好咁對啲小動物，佢哋會受傷，佢哋當然無理我。隨後，喺後面聽到有個工人姐姐話「哥哥唔好咁啦」，但就繼續同其他姐姐傾計

未幾，阿哥哥就乘勝追擊咁起勢追住隻鴿踢。好彩我影到相，我同佢哋講「網上見」就走咗，所以希望小編可以幫我出post，等我可以遵守承諾

我想講，好彩隻鴿係精精神神，如果係病病地縮埋一嚿嗰啲，分分鐘已經俾佢踢死咗。其實雀仔都有生命，咁細個就恃大恰細，大個咗好易有暴戾嘅性格，希望佢爸爸媽媽可以教到佢做一個有愛心嘅人啦

讀者投稿@西太后