#ParentLicenses2473

係咪我多事？

新年到而家有件事令我一直耿耿於懷，所以寫上嚟問下大家有咩睇法

有日去男友屋企拜年，當中有對姨娚（讀小學嘅兄妹）一大朝早已經嘈交打交咗幾轉，一路重覆阿哥整阿妹/阿妹話阿哥，然後雙方動手。最後兩個一齊喊，周圍嘅人氹返佢哋，最終就得到佢哋想要嘅嘢

到咗晚飯後，我哋大人都想俾啲小朋友一齊去公園玩多陣。喺停車場等車期間，唔知點解兩兄妹又嘈交。雖然佢父母已經叫停同隔開佢哋，但佢哋仍然怒氣沖沖互睥對方

片刻間，阿哥好似擂台選手咁突然拉後隻手拉弓，然後就一拳打落阿妹個肚度。我同男友親戚睇到呆咗，佢父母就一邊安慰痛到踎喺地同失控喊叫嘅妹妹，一邊話阿哥點解要咁做

阿哥隨即喊埋一份，又話無人錫佢，個個都幫住阿妹。男友嘅媽媽即時話無人錫都會有佢錫阿哥，而且叫佢唔使道歉

嗰吓我忍唔住口講咗句：「吓，打完人唔使道歉㗎？」竟反被我男友話咗句，令我唔開心

我明白周圍親戚同佢父母都努力令小朋友情緒冷靜返，但我出聲係咪太多事？其實喺嗰個情況同場合，應該堅持要個小朋友道歉定係放生呢種行為先啱呢？

讀者投稿@想考牌的人