#ParentLicenses2460

本來只想打幾句回應喺二月二日發佈的 #ParentLicenses2456 貼文，因為大家都話唔明原投稿者想講咩、篇文冇主旨云云，但其實佢有㗎。本想回應的我，打打下留言變咗長篇，咁不如試下出文啦?

我明嗰位原投稿者篇文嘅主旨，佢係想話個老公自細受盡寵愛，亦覺得所有嘢係應份，唔會理解到家姐阿哥童年不受寵的陰影。直到自已生咗仔後重想生個女，更揚言一定會偏心個女，不諱言將佢自己童年快樂回憶（及長姐長兄的童年陰影）重複編寫，所以原投稿者決定唔會生多個出來，被人特登偏心任何一個

我覺得佢做得好呀，明知另一半一定會做呢啲偏心的事，所以唔會生第二名小孩。就算自己唔會偏心，兩個仔女都愛，但亦難保喺佢哋成長期間得到不可控制的偏心情況。其實唔只要有能力至生，係要有愛至生，小朋友唔係大仔/女的「陪玩專員」，亦唔係完滿你家庭的工具

不過我覺得最好笑都係好多人話「想生多個女/仔陪個大仔/女」，性別有得揀？ 生咗出來重要揚言只錫女，咁如果生多個仔呢？會唔會覺得生女夢碎，又話錫晒個大仔㗎？個個都係骨肉，點解要以不公平方式對待？

我朋友就係咁，佢揚言生個仔陪個大女，點知都係生女，然後當BB一出世就話佢個樣似足老豆。本來已改定個名同家姐一樣偏女仔啲，但一見到個B女後就要搵人改名，改個旺父母或者同求B女聰明的名，即係有「智」、「慧」或「聰」嗰類名，再不停強調唔似家姐咁靚女（事實只有佢覺得大女靚），所以一定要佢努力讀書，一定唔會俾佢學畫畫或有藝術成份的興趣班

簡言之，即係家姐得寵，只有佢可以因應興趣學咩都得；細女不得寵，只能在學業上努力，但唔好諗住屋企俾到資源佢補習，啲錢係要留俾家姐培養氣質興趣

兩個小朋友入晒小學，佢真係夠膽死阿妹只有參加學校嗰啲興趣班，出面所有畫畫彈琴嗰啲全部冇。每年細女生日，父母都會喺社交帳號上發佈賀文，內容重重複複「因細女樣子問題，希望佢懂事努力讀書，如果唔係個世界就冇佢立足的餘地」

大家都覺得細女慘，而且搲頭佢眼中大女究竟有幾靚？不過我唔想直接講小朋友，只能夠話佢夫妻二人樣子都係中下，而大女似個老婆，細女似個老公。我只能夠講，你只要足夠偏心，就會覺得某子女似自己，覺得佢靚

生仔生女冇得揀，BB亦冇得揀自己父母，請啲準父母唔好有偏心呢啲行為或念頭

相片來源@年少日記
讀者投稿@左手又係肉 手背又係肉