#ParentLicenses2445

我有個女性親戚，因為同佢幾年無再往來了，睇怕都唔會再見佢，所以分享下佢嘅事

喺大約廿年前，呢個女親戚結婚，婚後幾年一直想生BB但唔成功。佢見重有幾年就四十，怕越來越難生BB，遂去做IVF，咁佢哋就成功生咗個BB

女親戚生咗之後，有工人姐姐同一個親友幫手湊BB同打理頭家。佢一坐完月無耐，就去大陸整甲、按摩，通常即日來回。都明嘅，連計埋之前準備生BB，足足困咗一年嘅規律生活，坐完月當然想去玩下，人之常情。不過之後兩年，佢一有時間又係北上玩，重開始玩埋微整容、割雙眼皮、開眼線、打BOTOX，咩都做下，有時會過一晚夜先返屋企

喺個BB大約三歲幾時，有陣子佢差不多日日出街，早出去但會返屋企食飯，小朋友就留俾工人湊。佢老公有同朋友搞生意，做服務業，所以要早出晚歸，發現成日打電話返屋企都係話老婆出咗街，手提又唔接，之後有幾次佢問外母知唔知老婆去咗邊。太太不斷整容又唔黐家，其實正常男人都會諗有古怪啦！卒之後尾搵到原因，就係佢舊情人搵返佢，但女方堅稱無做對唔住老公嘅事，只係齋搵返舊朋友陪行街食飯傾計咁而已

佢老公當然想挽救婚姻，無計較有無發生咩事，都想個老婆返來，BB可以見多啲媽咪，唔想頭家散。女嘅就話佢需要人呵護，要有被愛、被重視嘅感覺，唔想日日淨係對住BB同工人。咁其實愛情同麵包好難同時有，而且生BB係佢哋公婆共識㗎嘛，點解生完又唔想成日對住BB呢？！佢老公雖然都唔係浪漫型嘅人，都應承多啲陪佢。擾攘咗幾日後，女嘅叫做暫時同舊情人斬纜唔再見，佢哋一家之後間唔中都去下短途旅行，上遊輪玩等等

不過喺幾年後得知，喺那次挽回婚姻後只不過係兩年幾時間，佢哋都係簽紙離咗婚。女嘅連爭撫養權都唔爭，將小朋友撫養權交俾老公。查實中間唔知兩公婆關係點去到呢個地步，因為當中佢哋都有出席家庭聚會、過年、飲宴、做節都出現下，發現原來佢哋有次一家去旅行嗰陣都已離婚，全部戲交足晒，無人聞到陣味已離婚。既然佢哋都決定咗離婚呢一步，我哋唯有聚會時一齊做下戲扮唔知情囉。如是者，就咁樣過咗幾年

近幾年因為疫情，知道女親戚返咗大陸生活，已無見過佢了，而且佢呢幾年來，年中都無幾個禮拜留喺香港，已知喺大陸搭上咗有婦之夫了，對自己親生骨肉早已不聞不問

當初花盡心機去整個BB出來，大家都感嘆個小朋友好可憐！始終小朋友係自己生嘅，就算同老公無感情，點都要理下啩？

讀者投稿@CHILL