#ParentLicenses2432

首先恭喜版主一家，希望媽媽快啲復原，BB健康快樂成長

我陀第一胎時滿懷希望，還小心奕奕咁「跟書」陀。照結構當日，滿心歡喜入去，點知見到一啲好明顯的結構問題，雖然係非致命的。當然有問過自己千萬次「到底我做錯咩會咁？」「我命水唔好剋到BB？」等等問題去否定自己。最後，我決定同肚內BB立約：「媽媽希望你健康開心，第日你讀唔讀書自己發揮啦」

然後我開心咁過餘下懷孕嘅日子，想食乜就食啲，總之西醫話唔食得嘅就唔食。結果BB順利出世，但經過一輪測試後，判斷嗰個器官都係冇用，最後要拎走。好彩經過手術後托賴總算健康，但成日要出入化驗所、診所做手術後跟進檢查

最近帶小朋友去兒童醫院覆診，同日有好多腦症小朋友，好幾個係完全不能自理的，我見到都好心噏，同時又諗下呢啲小朋友嘅父母如果有得揀，一定會揀小朋友身體健康，冇人會想仔女咁辛苦

作為一個冇考牌的老母，想勉勵下大家：

一、小朋友健康出世，真心恭喜你，不論射精早定遲，BB係大B定細B，都贏咗好大半，因為身體健康並非必然

二、一世人流流長，唔好太著眼呢刻小朋友讀咩幼稚園、咩小學、咩中學，係唔係名牌學校。健康快樂嘅小朋友自然會搵到自己嘅路，不論留班一年，甚至揀錯科重讀幾年大學，只要成世拉長睇都冇咩大不了

三、不幸流產或有事故的懷孕，母親千萬不要自責，並非所有事都有原因

四、想生又未有嘅，唔好氣餒但不要太緊張，趁機享受未有小朋友嘅自由自在

讀者投稿@豬媽