#ParentLicenses2429

老公前妻又嚟料，我真係嬲到要即刻嚟呢度爆出嚟！雖然唔係好關我事，但我諗一個正常人聽完都會嬲。呢個前妻同之前喺度出過post，與唔要個小朋友但死霸身份證嗰個係同一個人！我就嚟覺得佢啲事蹟可以出本書

話說老公同前妻有個九歲嘅仔，佢三歲嗰陣父母就分開咗，前妻要咗撫養權，老公每個月俾贍養費。當時老公住新界，前妻住九龍

直到小朋友準備升小學，有一日前妻突然喊晒口打來，佢話覺得自己照顧得個仔唔好，覺得跟住老公對小朋友嘅教育會好啲，著我老公要返個撫養權。當下老公諗都無諗就答應咗，話晒個仔都係自己，緊係想留喺身邊

然而，之後去律師樓搞轉撫養權時，前妻提出多多條件（呢啲有機會之後再講），唯一最重要嘅就係前妻講到明唔會掉返轉頭俾贍養費，因為做保險收入唔穩定。我老公話知佢啦，都無寄望佢會養，隨即就答應了

自從個仔上到小學，前妻都搬埋來附近，話方便見個仔。我覺得佢咁都算有心，點知只係每星期五晚返去前妻處所，直到星期日晚返嚟，短短幾日，每次都要人哋車到去佢屋企樓下，再等佢電話去接返個仔。前妻嘅原因係因為「你哋有車，我無」

頭嗰幾次都算，之後開始會間唔中話星期六約咗人，所以星期六早上送佢返嚟，夜晚先接返，星期日先再叫我哋去接佢。當下我只係覺得痴撚線㗎，而家托兒所呀？同埋我同我老公都有自己生活，我哋唔介意帶埋個仔去街，但介意係個女人去街嘅時候要幫佢做鐘點咁款！

老公唔想將個仔做磨心，將就咗幾次後前妻變本加厲，大家頂唔順之際就同前妻嘈咗獲金。因為我哋同奶奶同住，所以最後奶奶為咗唔想我同老公嘈交，又唔想個仔做磨心就做咗個中間人，佢負責同前妻交接個仔嘅安排。從此，我奶奶就好順理成章做咗司機同鐘點，btw奶奶樂意咁做我就唔理得咁多啦

戲肉嚟啦

因為某啲原因我哋一家就搬咗出去自己住，無再同奶奶住，所以個仔都有同前妻講之後安排。因為原來我哋同前妻係住同一區，而家係相差兩個站，而且我都有自己小朋友，週末時姐姐放假我會帶小朋友去街，無人standby喺屋企做佢嘅托兒所，所以都同個仔講，逢星期六我哋會車佢返去，但星期日一係就早上我哋去街時接埋佢一齊去，一係就晚上八點半後等工人姐姐到家再叫前妻送佢返嚟

點知前妻就話因為我哋搬屋無通知佢，係得個仔講，太遠啦，所以唔會送佢返嚟，只會送佢去嫲嫲或者姑媽屋企。WTF？兩個站都話遠？一星期見得個仔一兩日都覺得遠？都已經唔使接，送到去佢屋企樓下，只係送返嚟都話遠？除咗「痴撚線」，真係唔知攞咩形容

直至到今星期傾好咗，我哋送個仔返去，星期日佢送個仔返嚟，以為一切安好，個仔返到嚟就入房偷偷地喊。老公入去問個仔咩事，佢即刻攬住老公爆喊。我從未見過佢咁，雖然唔係親生，但個心都揦住揦住

原來係因為前妻今日送佢返嚟嗰陣，等巴士條隊好多人，就開始燥底，不停鬧個仔。前妻同個仔講話：「嗰時叫你跟嫲嫲住咪好地地，死都要跟住爸爸，搞到而家咁麻煩！」

個仔答佢：「因為爸爸話照顧仔女係父母嘅責任，所以我選擇跟爸爸」

前妻聽到呢句說話就更加癲，不停鬧。個仔好委屈、好唔開心，因為喺佢角度明明係媽咪話掛住佢，所以佢先返去見，點解會咁？所以返嚟最終破防，攬住我老公嚎哭，我哋都未見過佢喊到咁

我真係覺得如果本身唔可以全心全意去愛小朋友真係唔好生，呢個真係一輩子嘅責任！真係痴撚線！自己唔照顧個小朋友都算，重想剝奪個小朋友跟爸爸嘅權利，重要去怪責個小朋友！其實個小朋友嘅老竇老母未死㗎嘛！點解要逼個小朋友去跟呀嫲？個人係自私到一個咩地步先至為咗方便自己，要個小朋友媽媽又見唔到，爸爸又見唔到？當初生仔又無兩萬，既然咁唔愛個小朋友點解要生佢出嚟？

前妻自己照顧咗個小朋友幾年，突然話唔要撫養權就送返嚟，之後話想見，又搬埋嚟，表現到好似好錫好愛佢咁，但自己約咗人又失驚無神送返嚟。自己唔要個仔都算，重要怪佢揀跟呀爸唔跟嫲嫲累到佢要等車，呢啲呀媽真係容許我講一句難聽的，真係唔死都無用，無呢啲咁嘅呀媽好過有?其實食完晚飯，一齊坐下車等下車，珍惜大家相處嘅時間，唔好咩？

除咗把口提住幾愛幾錫，其實實質又有幾愛？

讀者投稿@一言難盡