#ParentLicenses2394

帶細路去玩就掛住自己玩電話乜都唔理，影響到人就搬「佢只係小朋友」「你咁大個唔識就吓小朋友咩」呢啲廢話出嚟嘅廢柴家長，平時上網見得多，今日終於俾我遇到，重嚴重影響到我

當時我忍唔住當場話個家長，佢竟然重可以懶寸咁覺得自己冇問題。我而家就將件事寫出嚟，俾你條柒頭睇吓到底其他人係咪同你一樣睇法

話說夜晚八點左右，我落街練吓「Yo Yo Run」（補充：會有「嘟」嘅聲響，跟住呢個節奏會越嚟越快，約六分鐘就會跑完，練一次就夠）。嗰晚羽毛球場冇乜人，就去羽毛球場跑啦

整個球場由兩個羽毛球場組成，我就選擇喺最邊邊靠牆一邊來回跑。當時冇人打羽毛球，只有一個工人姐姐帶一個細BB散步玩。工人姐姐全程陪實BB，我有同姐姐講我來回跑，請佢小心啲。聽到佢用簡單廣東話教BB：「哥哥跑步，唔好撞撞跌跌」，呢個OK冇問題

不過，重有另一對分別大約K1、K2嘅小兄妹早就喺場內跑嚟跑去，由我行入球場到熱完身，阿爸都全程低頭玩手機冇理過佢哋。咁我就同兩個小朋友講：「叔叔會咁樣跑步（用手指住示意來回），你哋要小心，叔叔好快做完運動」

然而，因小朋友係由生番教出嚟嘅，真係唔會識聽人話

到我開始跑（前段來回廿次個節奏慢啲嘅），兩個細路就好興奮咁跟住我一齊跑。原本成個球場咁大，我理得你做乜吖，但佢個大仔係全程推住架超市鐵車嚟跑，佢阿妹又跟住跑，而且佢哋似乎當咗我係遊戲機咁，以為自己玩緊「青蛙過河」，不斷推住架車跑嚟停喺我前面。到我跑到前，佢哋就會急急推走

其後，有一次我已經就跑到，佢先推架車想穿過我嘅跑步路線，結果架車撞到我。唔緊要，他只是個小孩，唔識判斷好正常。當時速度唔快，唔太影響我節奏，冇嘢繼續跑

佢阿爸係聽到撞到鐵車聲，終於識第一次開口講嘢。爸：「小心啲唔好阻住人」

冇錯，佢係整到人先識開口。當然啦，都係嗰句，生番真係唔識聽人話，佢兩個小朋友繼續冇停過，而阿爸又繼續玩電話

跑多陣後，今次到阿妹。佢明明係跟住阿哥避開咗我呢舊「河上嘅木頭」，點知佢又突然轉身回頭跑去我度，好在係我避開咗佢。佢阿爸又識講多次：「小心啲唔好阻住人」

係呀，佢覺得講咗就完成咗佢嘅責任㗎喇，理得自己個仔女有冇繼續阻住人吖，之後又繼續玩電話

隨後我跑嘅節奏速度已經好快，基本上一到盡頭就要轉身即刻再跑。佢兩個企喺我轉身位側邊，我都預判咗佢哋唔識預判，打斜跑到好開去側邊，避之則吉。佢老尾個仔竟然推咗架車跑去我前面攔路截劫咁，我啱啱轉身真係估唔到，撞咗落架車度

我卒之忍唔住問佢個廢柴老豆：「識唔識睇住你啲細路唔好阻到人？」

呢句問題成功展開激情嘅對話

?：「識唔識睇住你啲細路唔好阻到人？」
?‍♂️：「好似係你要睇住啲細路喎」
?：「佢哋咁樣係咪好易會撞到佢哋（我都廢時講會整親我）」
?‍♂️：「咁你咪試撞到囉，去試啦！」
?：「我做乜無啦啦要撞你啲細路？」
?‍♂️：「你牛高馬大唔識讓吓啲細路㗎？咁大個人蝦細路？」
?：「你係咪搞笑，係咪已經讓咗你哋，我縮喺場邊跑，成個球場其他位都係你哋㗎，隨便你哋點玩啦！重有，我要蝦細路就直接鬧你兩個仔，唔係選擇同你講啦柒頭」
?‍♂️：「喂哥仔，你嚟之前我哋已經喺度玩緊，而家係你阻住我哋呀！」
?：「大佬呢度先到先得㗎？你嚟先所以其他人唔用得？不過由你開頭乜都唔理，就知同你啲柒頭講幾多都嘥氣，一定覺得自己冇問題」
?‍♂️：「係呀係呀，以為自己講嘢好有道理咁，走啦阻住晒，拜拜（懶寸咁揮手嘅動作）」

因為節奏已經斷咗，我都廢事再跑。大佬呀，我只係想正常咁跑幾分鐘啫，你老闆我完全冇怪兩個小朋友，而家係屌柒你唔識做人老豆呀，柒頭！

讀者投稿@跑步L