#ParentLicenses2393

事隔兩年，諗返起依然覺得好嬲同好委屈，想上黎呻下。其實有啲人做咗父母都係累咗下一代，好可怕

某一個假日，我一個人推住個女入咗某一間大商場嘅日本U記，去睇下個女啲褲仔。咁啱個display位喺角落頭，我就推咗架車入去睇

突然之間，有個男人冇啦啦哄個頭埋嚟，距離十厘米左右咁hold住，再怒睥咗我幾秒。我一邊靜止咗扮若無其事，又一邊諗緊發生咩事？應該點做？係咪遇咗變態佬？

我之後忍唔住擰過去問佢

我?：「先生，請問咩事？」

佢?：「八婆，你架車撞到我呀！」

我?：「係咩？sorry呀。你直接講呀嘛，唔使哄埋嚟睥住我」

佢?：「你做人老母，有冇家教㗎？」

佢?：「（繼續鬧）」

我?：「其實我應該都係揩到你腳邊啫，我個位夠晒攝落去，都冇好大力撞到你。大家都係有小朋友，互相包容一下啦，冇心嘅」

重點係我肯定無撞過佢，因為撞到架車係會䟴一䟴，我係完全冇感覺同埋好順利咁直入角落位睇啲褲

佢?：「（繼續鬧）」

我?：「我都同你say埋sorry啦，你男人老狗，唔小心揩到你，又唔係撞傷你，咁其實你重想點呢？」

聲浪唔大，我哋對話一直都冇人理。忽然，佢老婆擰個頭嚟，我真係人生第一次見識到潑婦罵街，從兩米遠都聽到嘅聲線，加上連珠炮發嘅句子，再夾雜粗口，身邊重有兩個目測五至七歲嘅小朋友企喺度

佢：「你講乜x嘢呀！乜x嘢男人老狗呀！你點x樣做人老母呀？做到你咁樣，你眼有事呀？架車周圍撞，你咪x做人老母啦……（下删五十字）」

我：「我見你哋原來都有小朋友，都推過BB車啦……

我重想講落去嘅時候又俾佢老婆一輪咀咁插話同鬧，所以我發現佢哋真係唔講道理同癲嘅，加上我即使揩到都係我理虧。雖然好小事，但一陣被人拍片容乜易變到我有問題，分分鐘重傷到我BB

於是，我沉住氣笑一笑講咗句?：「你哋開心就好啦」

佢老公呆咗一秒，話：「我哋緊係開心啦，係你唔開心咋嘛！」

我?：「放心，我冇唔開心，啲人個個望住你哋咋嘛，你哋鬧得開心啲啦」

因為我喺個角落，佢兩公婆擋喺我前面，我專登重講「唔該借借，我要出去」，然後就一路走去成兩米咁遠嘅收銀處排隊。個女人把口係完全冇停過咁鬧，咩「死肥婆航空母艦咁大份咪喺度撞嚟撞去（利申我係中碼身型，佢先係大碼）」

全間店望住佢，而我只係回回頭望下佢，沉住氣俾埋錢走人，一離開舖就飛奔爆喊，委屈到極點，第一次帶住BB被兩個人夾住喺角落咁大聲鬧?。後來諗返，其實最慘係佢啲仔女，至於男同女都係天生一對

後記：成件事係冇職員出嚟幫過手調停嘅

讀者投稿@Miss C