#ParentLicenses0880

由細到大被呀爸打，就算冇做錯，佢只要覺得你有錯，打咗先算

遲到一分鐘，打！
唔合佢心意，打！

打都唔至，會踩屋企貓狗，仲會抵賴：「一日最衰都係你，你知我eq差啦！你逼到我打爛晒啲嘢，我話你聽，係你破壞屋企，我而家就去打媽咪，我而家就上大陸叫雞，千錯萬錯都係你錯，我而家就將隻貓24樓甩落街！所有都係你嘅錯，你逼我！！」

細個嗰時，呀媽每次都同我講：「你同爸爸講對唔住啦，講完就冇事啦！我都會同爸爸反映返佢都有錯，叫佢同你講對唔住」

因為相信媽咪，所以每次我即使冇錯都會講對唔住，就算跪地求饒認錯，我都會做

結果我小學中學每件事都逼自己完美，一開始我一直諗：「到底我做錯咩，佢都想我好啫，我改囉。」

上到中學，成績非常好，每一樣都完美，但依舊不斷被佢用唔同藉口打。當時我好失望，因為我終於發現問題不在我，佢當我係出氣袋發洩

原本以為同媽咪求助係有用，毎次都同媽咪傾，媽咪都會安慰我。結果，有次偷聽到媽咪答爸爸：「打女啱㗎！細細個我都係被人打大㗎啦！你冇錯喎」

我撤底絕望，同憤怒

同社工求助，結果爸爸媽咪戲精上身，學校以為我做戲，返到屋企打得仲甘，因為家醜不得外傳

同親戚求助，全部人都只會叫我寬恕原諒屋企人，叫我：「唔好咁小氣，好小事，大個就冇嘢」

結果，我中五危坐窗口三次，一直想跳落去，但冇勇氣。我一直糾結：點解我屋企會咁？問咗好多點解

突然有一日，諗通咗

呀媽呀爸一定錫仔女？笑話。有j就可以搞大人個肚，就有小朋友，根本狗屎垃圾都可以做爸爸媽咪。一諗通咗，就再冇對仼何人有期望

好彩CE，AL成積好，我同自己講：「一定要脫離佢哋過自己生活。」我睇過幾次心理醫生，食咗兩年藥。而家我28歲，已結婚，完完全全冇理過佢哋，喺老公屋企先知原來一家人係咁開心。好多謝老公，俾我知道原來有一個家係幾温暖

親戚們不停同我講：「要原諒。」但一個唔認錯嘅人，可以點原諒？可以點寬恕？

佢最後一次同我講嘅説話，就係「對唔住囉～～～但我真係唔知我有咩錯～～～～」

嗰「～～～」就係拖長嘅尾音，諗起都令我超級憤怒嘅尾音，一啲悔意都冇嘅對唔住。佢仲好意思周圍同親戚講：「都唔知點解養到個女咁不孝？」然後所有親戚只會同情，冇人同情過我

就係細個每一次我都會認錯，所以爸爸先從來都唔認為自己有做錯。所以我以後都唔會理佢，用時間話俾佢聽我嘅憤怒同痛苦

讀者投稿@Michelle