#ParentLicenses2374

相信好多人都知喺廸士尼等睇煙花，係要一早搵個靚位。咁八點煙火表演，基本上到七點半已經無咩好位置

喺日前，當時七點廿五分，小弟就搵到個還可以嘅位置去等煙火表演。我嘅正前方只有一位小朋友仔同佢爸爸企喺度，小朋友仔重拎住個米老鼠氫氣球。我見唔太阻住視線就無理到

未幾，時間到咗七點四十五分，小朋友嘅媽咪同佢家姐加入。家姐又係有個氣球，不出所料開始氣球大戰，又揈嚟揈去，少不免會「食波餅」

食波餅呢啲都係小事，只係小朋友玩下，但太太睇表演時被氣球擋住先係大事！

喺咁迫嘅情況下，完全唔允許我再換位置，所以心入面已經做好心理準備同對白，打算喺表演開始之際就開口請佢哋放低氣球

然而，接落嚟嘅發展真係令人估唔到

開始表演前幾分鐘，喺我哋無表示任何不滿嘅情況下（包括表情同言語），媽媽主動叫佢哋拉低個氣球，續說：「唔可以阻止後面嘅人睇表演」

嗰下真係感動到呢，期間細佬重細，都有放開氣球偷偷玩兩下，都立刻俾佢媽咪阻止。將心比心，自問都未必會有能力喺未有人開聲之前，就諗到要拉低氣球呢一步

呢啲媽咪，呢啲家庭，生多幾多個都一定可以教出到對社會有貢獻嘅人！

讀者投稿@閒人