#ParentLicenses2369

我來自中產家庭，喺細個時都同而家嘅好多細路一樣，每日學好多唔同類型嘅興趣班同補習班，例如星期一至三分別上中英數補習，星期四至日就學幾樣樂器同油畫

每日放學後就係去補習、學樂器或者畫畫，返到屋企練幾個鐘樂器，最後先做自己啲功課，幾乎每日都一兩點先瞓。而家睇返細個啲相，原來我咁細個黑眼圈已經咁勁

因為係被迫學，所以我好討厭樂器同畫畫。有好多次嘗試同父母反映好攰，要求減咁啲興趣班，但我鐘意打羽毛球又唔俾我學

佢哋就話：「女仔之家學咩運動？一定要學文靜嘅興趣，你考唔到演奏級你唔好返屋企！」

當時嘅我真係好攰，日日都唔夠瞓，同親戚呻，得來嘅都只係幾句「好多細路冇你咁好彩有咁多興趣玩，你玩緊樂器嘅時候，人哋屈喺間劏房度做功課」、「你父母大把錢，又咁捨得揼咁多錢俾你補習，你都唔識珍惜，你真係唔知足！不孝女！」

我先意識到，自己只不過係一部冇自己思想、唔可以有自己興趣、唔可以反抗父母、用錢啤出嚟嘅完美機器

讀完預科，我就改電話兼離家出走，租咗間劏房。日頭返文職，收工去教樂器，放假就約啲朋友打波、一齊行街食嘢睇戲、一齊去主題樂園玩，總之係做返啲童年冇乜點做過嘅嘢

原來，啲人話用一生治癒童年就係咁解

讀者投稿@小時候的我很累