#ParentLicenses2366

是咁的，我都做咗私補老師一段時間，教英文

有啲家長會長補，有啲就補一兩堂就飛起我，藉口多的是。呢啲家長通常都好進取，個小朋友未去到嗰個水平就係咁谷佢，同時都係應該因為我達唔到佢哋心目中嘅要求而被棄用。不過都算了，百貨應百客，本身由有啲唔開心，去到而家已經冇乜感覺

不過，當中有個經歷令我印象好深刻，想喺度分享一下（以下都係以假名稱呼對方）

話說有個學生係我以前做補習社嘅小朋友（Mary），教佢嗰陣係幼稚園，而家已經小六。我一開始做私補就喺Facebook群組登廣告招生，巧遇返Mary嘅家長（陳太）。陳太好開心話見返我，於是就開始商量補習嘅事

Mary讀嘅小學同中學都係港島傳統名校，top tier嗰種。陳太話想佢讀好啲 （由band 1B轉讀band 1A），所以就喺佢就讀小學期間安排佢轉過一次校。陳太為人雖然友善，但超級進取同自相矛盾，甚至係socially awkward

陳太喺Facebook messenger已經話一定要我補佢個女，留埋電話要我打電話俾佢傾。我心諗點解唔喺WhatsApp文字傾就算，而我同好多家長都係用咁嘅方式溝通，唯獨佢一個要打電話

見陳太咁進取，起初令我有啲抗拒同唔太想理佢，但佢又好熱心介紹埋其他同學仔俾我識，我就問始嘗試轉下心態去面對陳太。佢再提話要同我傾下補習詳情，反正都係「終需見家翁」，就決定同佢電話度傾

對話中，得悉Mary喺出面補習社重有課程上緊，而且有另一個私補老師教緊佢。陳太係咁讚我學歷好勁好有料，一定教得好好，故想決定請我，同時終止補習社同私補老師合作

Mary讀緊傳統名校嘅英文課程好深，學校小六嘅程度大概等同於喺普通學校讀中二三。因為我有另一個學生都係讀佢嗰間名校，陳太就問我平時點教佢，佢好認真聽就話我個教法好好

其實同陳太喺電話傾咗好多嘢，傾傾下就傾咗一個幾鐘，都係傾下Mary細個啲事。陳太話Mary幼稚園嗰陣好鍾意我，又提到佢安排Mary轉校面試嗰時，嗰間學校校長已經有同陳生陳太講：「你係咪俾好大壓力俾Mary？Mary啱啱interview個樣好大壓力，你哋做家長唔應該咁樣谷個女」

後來，陳太係咁強調Mary上一間讀緊小學課程好好，我心諗「咁你又轉去另一間band 1A嘅」。陳太又強調只係幫佢溫下general English就可以，再介紹下啲英文書俾佢睇。陳太再強調Mary冇特異功能，週末冇乜額外活動，時間就哂我全日就可以，但我事後發現佢其實有學西班牙文同打波

以上對話都俾咗我無比嘅壓力，之後我哋交換咗電話喺WhatsApp傾。佢發送晒Mary學校嘅平時分俾我睇，話佢只係過到個mean，但唔係最top嗰種。但佢喺電話講幫下佢溫general English就可以，俾下練習佢做下就okay。過幾日後，佢又傳送張圖俾我睇，就話Mary已經可以做到DSE英文卷嘅閱讀理解嘅B2。我心諗「你想點啫？又話溫general English就可以，你又俾DSE卷佢做，小六咋喎！」

臨開始上堂之前，陳生無啦啦喺Facebook加我好友，本身我唔知佢係乜水，當然冇接受到。原來佢發送埋訊息俾我提我要上堂，問下點樣收費。兩公婆真係奇怪，明明係陳太同我溝通開，陳生又走嚟加我好友，原來唔只陳太socially awkward，陳生一樣都係

我唯有問陳生：「咁我應該聯絡你定係陳太呢？」

陳生話冇所謂，跟住佢哋過一陣加咗我入個WhatsApp群組

原本我打算上完第一堂就同佢講唔再補佢，但上完第一堂感覺都還算可以嘅，唔會太抗拒先，嗰陣Mary就快要考試，就同佢溫熟考試範圍。當日陳生同陳太都唔喺度，所以都係電話溝通交待上堂嘅事。通常喺學生補完習後，我都會留功課，當日俾Mary其中一份功課係作文，到上第二堂時，我就會一邊上堂一邊改文，而Mary就主要喺旁邊做練習

唔知有冇英文老師有同感，始終英文唔係我哋母語，學生寫文有啲文法我唔肯定對錯時，我都會查字典核對一次。我嘅原則係學生錯，老師更加唔可以出錯，所以第二堂改文嗰陣，我都有用手機核對清楚再改。陳生當日喺度嘅，佢係咁喺間房同廳出出入入，扮搵嘢又唔係，唔知佢做乜。都算了，我繼續專心做我嘅事同再教Mary點樣寫得好啲

落堂嗰陣，陳生冇問我上堂做咗乜，就直接俾學費我。走咗冇耐，陳太就喺個群組同我講：「上埋今堂就唔使再過去補習了」

我一嚟覺得終於鬆一口氣擺脫到呢兩個咁socially awkward嘅家長，二嚟覺得你哋其實想點？又話停晒出面啲補習社嘅堂特登要補我一個，講到天花龍鳳咁，又加我Facebook又WhatsApp群組。我有諗過係咪我有問題，例如遲咗少少到，定係陳生誤會我上堂玩電話，其他家長飛起我都冇所謂了，好嚟好去，但呢對家長奇怪到我記到今日

讀者投稿@一位無奈嘅私補老師