#ParentLicenses2365

K3妹妹同小四家姐一齊中咗甲流發燒，連埋今日睇醫生冇返學兩日

今日診所比較多人，只係朝早八點半就已經要排隊掛號，額滿即止。好多家長一早就要排隊，我排到十一點籌，但等到十二點半先有得睇醫生

現場所見，有好多小朋友唔舒服發燒咳，包括我兩個女。踏入十二點，發現好幾個着住幼稚園校服嘅小朋友陸續嚟到診所。有幾個狂咳，係咁擤鼻涕，有個重貼住退熱貼

我冇講錯，小朋友係着住校服孭住書包入嚟。好明顯係放咗學後嚟睇醫生，亦即係話家長明知道佢唔舒服都照俾佢返學

其中一個着住校服疑似K3咁高嘅小朋友咳到想嘔，佢阿媽話佢：「要嘔就出去嘔，整污糟診所你就知死！」

有個女人睇唔過眼，窒咗個阿媽一句：「咁病就唔好返學惹人，咁細個俾佢屋企休息吓啦，咳到嘔重要鬧真係陰公」

個阿媽拋下一句：「關你x事」

等到十二點四十分左右，分別入嚟兩個小學生，又係發燒唔舒服。因為小學生係放半日學趕過嚟睇醫生，兩個媽咪都異口同聲同姑娘講：「籌號過咗等最後睇」，換言之即係又係帶病返學

其實唔舒服唔係應該好好休息咩？逼個細路返學咁辛苦有咩意思？喺流感高峰期間，如遇小朋友唔舒服，希望各位家長高抬貴手，帶佢哋睇醫生，俾佢哋喺屋企好好休息啦

讀者投稿@三寶媽媽