#ParentLicenses2360

今日搭輕鐵，見到有個女士A坐喺關愛座睇緊電話，隻手就搭住放喺隔咗條欄杆嘅BB車扶手上

BB車上有一個大概兩三歲，無著鞋嘅女仔，而車籠裏面散有好多餅碎。BB有時玩吓啲餅碎，有時又企起身跳，有時又踢啲餅碎。我睇落都有啲危險同整到成地餅碎，但女士A仍然無理過佢，只係睇電話

未幾，有個女士B推住BB車上車，車上有個兩三歲嘅男仔。兩架BB車相隔咗少少位咁泊，女士B就全程扶住BB車企

再隔一陣，女士A終於發現成架BB車都係餅碎，隨即開始將啲餅碎掃落地。女士B見狀，立即推開啲自己架BB車避開啲餅碎

女士B：「小姐你唔好掃啲餅碎落地啦！」

女士A：「我唔係掃落地，只係想掃埋一邊」

女士B：「但你掃晒落地呢！」

雖然我都覺得咁樣唔好，但我又唔夠膽出聲，因為好似唔關我事，出聲唔係咁好。我都未諗完，女士B已經開咗口

周圍嘅乘客開始望佢哋，同時BB女伸手想同BB仔玩。女士A立即出聲制止，好惡咁講咗句：「三唔識七，你唔好搞人啦！」

女士A重有吟吟噚噚咗幾句，但我聽唔清楚。佢一邊吟，一邊用濕紙巾抹返車仔同地上嘅餅碎

女士B無再出聲，但附近啲乘客開始指指點點。我心諗，女士A肯主動抹返地面係好事，但如果佢一開始就注意住自己個女，就唔需要搞到自己咁尷尬啦，俾著我真係想搵窿捐

讀者投稿@膽小的我