#ParentLicenses0838

我係家姐，對落有個細佬

自細讀書操行都唔差，但無論幾努力，係媽媽眼中都唔會係好，可以再更好，從來無任何獎勵/鼓勵嘅說話，但細佬只會每年升到班，即使包尾，都叻仔

一路都知偏心，甚至知自己係唔被愛

記得13歲嗰年，媽媽帶我哋同朋友去離島玩。過程中，我唔記得做咗啲咩，可能係同其他小朋友用筷子敲碗呢類，媽媽即刻當眾鬧我。其實本身佢當眾鬧我，我不以為然，因為經常都咁鬧

旁邊有個師奶就話：「X太，嘩，洗唔洗咁鬧，個女真係你親生㗎？」

我媽竟然話：「係啊，佢唔係我親生㗎 ，我邊有咁曳嘅細路」

13歲嘅我，可以做咩？只可以跑入公廁喊

其實一路都知偏心，只係將事實講出口就好難接受，真嗰句唔好講出口嘛，我自細都已經成日懷疑自己係咪爸媽親生

18歲就出嚟做嘢，月入8千，畀咗2千做家用。以為都算係咁，身邊好多朋友搵再多都係畀1千，甚至唔畀。但媽就係覺得唔夠，成日畀說話我聽，話得個雞碎咁多，買鹽都唔夠咸，但細佬唔洗畀，仲可以問媽拎返轉頭

當年我係諗住再讀書同儲錢結婚，因為咁，我同媽媽關係愈來愈差。大概有5-6年我係早出晚歸，放咗工就約人食飯，11點先返屋企，沖完涼就入房。而媽為咗逼我畀多啲家用，無所不用其極：

唔洗我衫
鎖洗衣機
鎖雪櫃
我手洗完嘅衫仲滴緊水都放落我床
趁我返工就將我啲鞋放上我床
不停改wifi密碼
……
究竟有幾憎個女先會咁做

到我結婚了，我一早預咗家人唔會參與。未婚夫係咁鼓勵我要勇敢啲，試下用呢次機會修補關係，無論得同唔得，反正之後都唔一齊住

於是我好勇敢，準備晒婚禮應該要準備畀佢哋嘅嘢。攪一個婚禮唔容易，過程中只有我一個人做。娘家更無人問過夠唔夠錢洗，洗唔洗幫手？不過，我覺得自己婚禮自己攪，就算過程好辛苦，唔緊要，死頂：）

結完婚之後，搬咗出去住，又出奇地同媽關係好咗。媽久唔久會打畀我，約我出去食飯（當然我埋單），令我相信人心肉做，媽終於發現我乖

其實中間老公提醒我，唔好被一時嘅「好」蒙蔽自己，要記住自己以前受過既傷害。並唔係叫我以惡報惡，但唔係不停付出，因為到最後受傷嘅係自己

結婚大概兩年後，曾經有段時間收到大耳窿收數電話，原因細佬借咗人錢，走咗佬。我好擔心娘家，父母好嬲，話當生少個，要賣樓搬屋，於是我幫佢哋安排好晒睇樓

但媽無耐打畀我，佢話：「唔洗睇樓啦，細佬返咗黎，諗住同佢還錢」

我話：「點可以咁，趕佢走啦，有咩理由要你哋老人家孭咁大筆數」

媽話：「家姐你未做人媽媽，唔明㗎啦，幾唔好都係自己個仔，我點趕佢走？」
……

咁點解當初做咁多嘢逼我走？而家會拉返個仔返嚟，難道我畀得少家用係衰過個仔欠下巨債要父母還？廿幾萬，話還就還……

我嗰刻覺得爸媽好富貴，而我係從來都唔知

自從娘家幫pk細佬還完巨債後，我已經少咗搵娘家。無耐媽媽再搵我，原來細佬攪大咗條女個肚，要結婚了

我發咗癲咁叫媽嗌條女落咗佢，兩個腦筍都未生得埋嘅人學咩人做父母，只會要我父母埋單，唔係生出嚟就叫負責任。但媽話我狠毒，點可以叫人落仔，話我未做人阿媽唔明㗎啦

我有十萬個唔願意去呢個婚禮，但身邊無數人同我講，去完就算，做得好好睇睇，以後唔好再見

終於到婚禮當日，我只係出席婚宴，已經接近開席先出現。一坐低成班親戚衝埋嚟話我唔應該，唔應該咁狠心，唔顧親情。我同自己講，唔緊要啦，食埋餐飯就走

係其他親戚口中得知，原來我爸娶媳婦好開心。婚宴酒席揀咗最貴，所有嘢都揀最好，仲由我爸埋單

婚禮上，細佬感激爸媽，因為個婚禮幫佢哋兩公婆出心出力，聽完我已經忍唔住，默默地離開了

自此就無再同娘家聯絡，佢哋亦無搵過我

我到細佬結婚先發現自己係外人。我結婚，父母零參與

我問佢哋：「傳統禮節點做好？」

佢哋話：「唔識，第一次嫁女，你上網搵或者問朋友」

但到細佬結婚，佢哋突然咩都會識，又會幫細佬埋單。而我就自己死慳死抵成就自己嘅婚禮，仲要過程中不停被苛求

到最後，我明白父母嘅錢要點用係佢哋嘅選擇，但真係唔好唔愛自己嘅小朋友，唔好要佢哋成日懷疑父母偏心「我係咪唔係爸媽親生」

我到而家仲會發惡夢，夢見爸媽鬧我嘅情景

真係唔係生咗出嚟，餵飽佢就叫盡咗責任

你係咪付出到愛同時間畀佢？

我媽嘅愛留咗畀細佬，無我份

你不愛我，何必有我

讀者投稿@*