#ParentLicenses0801

我嘅童年，老豆每日淨係嫖賭飲吹，啊媽同老豆兩個人日日嘈交打交，癲到喺屋企攞刀四圍舞放火燒屋要全家一齊死；我又會比啊媽打到皮開肉爛，打到隔離屋報警被警察起訢，直至佢哋離婚

離婚後，我媽放棄撫養權，老豆就申請寄養家庭

去到寄養家庭，十一年寄人籬下，個姨姨好嚴厲同佢個女成日打我，打到見瘀見血先會停。過住軍訓式生活，冇自由、冇玩樂、冇發言權，引致到好似啞咗唔夠膽講嘢

我從來都冇要求、冇提出，因為不管係咩都係唔會實現，夠膽提出就預咗被人打到開花。試過同福利署姑娘反映，姑娘視而不見

小學三年班時，喺親戚威逼下被性侵犯，我選擇啞忍。性侵一事到十四歲，陰影不但未磨滅，反而仲加劇咗。後來經社工勸喻，就去咗報警同睇心理醫生，14歲確診中度抑鬱，但因老豆一句話：「冇錢畀我睇醫生」所以我冇再覆診（其實佢係攞啲錢去瘟女同賭）。逼於無奈下我求啊媽支助我嘅醫藥費，點知佢話我：「抵死，係自己攞黎賤」叫我死咗去，唔好獻世同埋唔好再揾佢，因為佢老公唔知佢嘅過往，更唔知佢生過小朋友，所以佢唔再係我啊媽，就當佢死咗。（喺親戚口中得知佢嫁咗個有錢佬）

完全冇負過責任嘅啊爸啊媽種下嘅因，我要用廿幾年去承受個果，亦因細個時候被性侵令到不育

如果我自己企唔返起身睇唔開應該死咗十九幾世。最後用咗十年時間，靠自己終於放低性侵件事，亦都嫁到畀一個可以包容到我經歷嘅先生

苦盡甘來，我等咗廿幾年，終於擁有新生活新人生，而唏噓嘅係同父母卻就只有六隻字「老死不相往來」

讀者投稿@BT