#ParentLicenses2315

香港唔係冇好老師，只係好難生存

年半前，我開咗一間小型學習中心，要親自負責安排老師、同家長溝通、宣傳、收學費等等

家長嚟我哋度學嘢，唔嫌棄地方冇連鎖中心相比咁大同有規模，都因為老師教得好。慶幸我哋啲老師真係好有心，例如會做足課堂準備、有交帶、準時唔會放飛機，甚至有時見忙到七彩重會主動幫我手，佢哋真係好好。我哋會分七成俾老師，係希望留得住啲好老師

然而，有時真係做到好冇癮，好難支持落去

我哋中心規則一早寫明，但部分家長去補習或者其他興趣班，有事需要請假時，點解你哋要千方百計咁唔補堂呢？自己遲到，點解要求老師一定要補足時間俾你呢？

例如月尾請兩日，到下個月本身有四堂就只繳付兩堂錢，問家長補堂就話冇時間——簡單啲講即係將課堂順延。又例如遲到咗十五分鐘，家長未必即時要求老師補時間俾佢，但就會遲十五分鐘去接小朋友放學

其實每個月只有四五堂，但每個月都會請一兩日假，叫我哋點留位俾你呢？（當然病就冇辦法，但有時係去玩、旅行、學校有活動）但到即將要考試、面試、呈分時，就催促啲導師要點點點，又話小朋友邊方面好弱呀云云，要求老師要點樣教佢

更甚者，曾有家長每堂都問「今日呢班有幾多人上堂」，其實一班最多四個學生，之後嗰個家長就會揀一班得佢一個小朋友

再唔係就隔個星期調時間，或者前一個鐘先請假，甚至no show。我哋都冇扣堂，都可以兩個月內補俾你。但其實咁樣做，你哋覺得小朋友會學到嘢？當個個都咁嘅時候，老師又如何生活，可以點交租？

好聲好氣解釋好耐點解唔延堂，最後得到回應就係：「明白，咁我哋唔學喇，人哋邊間都可以延堂，重延幾多次都得」「咁冇時間補，我可以點做？」「我哋咁支持你哋，可唔可以唔好執咁正呀？」

有時真係好灰，想請教大家，我可以點做？

讀者投稿@凍檸茶