#ParentLicenses2313

同我老公一齊十四年，有一個四歲大嘅女。原本平平淡淡嘅婚姻，就因為女女嘅出世，生活變得不再平淡，甚至有好多衝擊。原因係，我哋都好錫個女，因此兩公婆都多咗拗撬

老公好錫個女，亦好顧家，本應應該好好至係，然而同時亦無可奈何，因佢嘅責任感過大，開始令我感到壓迫

例如出街時，我冇拖住女手一下，佢就即刻會黑面；喺遊樂場時，個女唔可以離開我嘅視線範圍超過五秒等等，當然重有更多類似嘅事情，但呢啲過份緊張嘅事，放喺佢身上面，一切變得理所當然！漸漸地搞到我一出街，個人都變得好緊張

以上所講，只係我想道出我老公其實都係一個好爸爸，只係緊張啲啫。惟有一樣嘢，我就覺得cover唔到佢嘅優點，甚至乎令我想帶女女離開——情緒問題。佢自己會無形之中黑面但不自覺，而我同女女就每日都活在呢啲氣氛下，令我好唔想再咁過落去

佢嘅情緒問題，係由一開始我識佢已經存在。嗰時太細個，唔知道同呢種人一齊係會影響埋自己。再耐咗一齊後，我先發現，原來佢全家都一樣，而帶頭者就係我老爺

老爺為人冇乜點，只不過太古板，同時亦都係一個話題終結者。久而久之，我都好少再同老爺講嘢。慢慢相處下來，我就發現到原來老公同老爺都好似，無論行為及言語都係。雖然我明白係好正常，但我就係好唔想個女又會似返老公，無限輪迴

我由原本一個好樂觀嘅人，都變得開始沉默，甚至要每晚觀察放工後開門返嚟嘅老公，佢到底係開心定太攰有情緒，而演變自己當晚嘅態度。不是我多心，係我見到個女佢都識得咁做，所以更加心悒，我只可以教佢第時要好好識人，唔係就會後悔一世

圖片來源@寶貝女既媽媽
讀者投稿@寶貝女既媽媽