#ParentLicenses2309

見到 #ParentLicenses2308 關於對教導小朋友點樣對待狗狗，我都有感而發

如我個名，我成日都會帶狗狗去狗公園。除咗每日行街放狗，我都會每日去屋企附近嗰個狗公園，一來自己可以同其他狗主傾下計，二來我隻狗又可以同佢啲狗朋友一齊玩下

然而，周不時都會見到有啲家長帶住一個，甚至幾個小朋友入嚟坐。我明白到狗公園無限制小朋友唔可以入嚟，但係小朋友們可唔可以唔好玩滑板車？

可能香港容許小朋友玩滑板車嘅地方少之有少，平時呢類型小朋友喺大街大巷表演「疾速」都算（而家長永遠喺後面用自豪嘅眼神望住個小朋友，或者望住自己部電話），你哋竟然入嚟玩車？要知道狗公園係一個容許狗狗放繩嘅地方，如果小朋友喺狗公園表演疾速，係會嚇到狗狗，更甚嘅係狗狗受驚會吠會追，大家因為咁而受傷對大家都唔好

另外有一班愛狗嘅家長，會連同自己小朋友同狗狗一齊入狗公園。小朋友入到嚟就會當成個公園都係自己地方，同自己隻狗喺度一路跑一路叫。Well，有無顧及其他狗主或者狗狗嘅感受？

都係嗰句，你哋咁跑法咁叫法，其他狗就會以為可以一齊玩，然後就會演變到一班狗追緊一個或者一班小朋友。四隻腳一定快過兩隻腳，當狗追到人類小朋友嘅時候，就會係樂極生悲嘅時候，而家長就會鬧返其他狗主們點解唔管好自己隻狗云云

如果你要當你個小朋友都係寵物，就要承受寵物與寵物之間嘅交流。狗公園主要社群係寵物，希望大家識得分下莊閒，謝謝你們

讀者投稿@成日蒲狗公園的狗奴