#ParentLicenses2307

晚上九點，喺巴士上，我抱住攰到瞓著咗嘅女（面向住我瞓），見近窗口嘅關愛座無人坐，遂坐落去

原本爸爸行緊嚟，突然有位著住件袍嘅「出家人」衝埋嚟坐，直接出手推開我個女隻腳（無掂到櫈），話我女隻鞋會整污糟佢（無掂到佢）

我即刻叫嗰位出家人：「唔好搞我個女隻腳，我俾你坐，我坐後面」

出家人：「係啦，我六十歳㗎，呢度係我坐」

我抱起個女起身，惟佢無意慾讓開，我就只好側身行出去，此時出家人就突然好大力打我瞓緊覺嘅女隻腳，並聲稱隻腳踩污糟佢件衫

我即刻問佢：「你做咩打我個女！？」

佢一直重覆：「我六十歳，呢度係俾我坐」續道：「你個女又唔係BB，咁大個，隻鞋污糟，你如果除咗佢隻鞋踩我件衫都得」

我好怕同呢啲野蠻人講嘢，故嘈咗一兩句我就抱住個女坐後面

當時爸爸就企咗喺出家人面前，而嗰位人士一直重覆，終於令好有耐性嘅爸爸忍唔住同佢講：「你都係出家人，每件事邊有對錯。你都識講你六十歳，我個女三歳咁大咋，佢瞓咗覺掂到你都唔係有心，你無啦啦打佢」

然後出家人仍然一直喋喋不休

直到我哋落車，我終於記起呢位出家人了。有幾次我抱住瞓咗嘅女，佢總係叫我讓坐俾佢，我都會抱住個女坐去後面或者企喺度，但今次對個女郁手就真係佛都有火

自問平時教個女坐車要定唔好整到人，瞓咗覺都會捉住佢腳仔驚掂到人或者整污糟櫈，萬萬估唔到瞓緊覺都無啦啦俾人打！我好後悔，我當時應該就個女瞓咗，因我抱佢行去後面掂到佢件衫而同佢道歉，然後要佢同樣立即因爲打咗我個女而向我女道歉

圖片來源@少林足球
讀者投稿@原本生日很快樂的媽媽