#ParentLicenses2299

作為一個女性，當然明白女權帶來嘅好處。作為一個有兒子嘅母親，開始懷疑呢個社會係咪應該要爭取番男權，整返個男版metoo

事源有日同我五歲大仔去康文署個室內兒童遊戲室玩，見到有個兩三歲女仔企埋一角，佢好似想玩又唔敢玩咁。本來我仔有自己跑跑跳跳好開心，玩玩下突然佢留意到個女仔企咗喺度望。我仔行埋去同佢講hello，跟著想拖住個女仔帶佢跑

可能係因為我哋有個細妹又係差唔多歲數，平時都有教哥哥要照顧妹妹，帶下佢玩。本來我見到哥哥咁主動想幫助呢位小女孩一齊融入一齊玩係好事，亦無去阻止佢，點知過咗兩秒，個原本喺度垂低頭撳電話嘅媽媽過嚟，扯開佢兩個再拉走個女

我仔見到有愕然一下就算數，無理佢繼續玩。隨即個呀媽大大聲同佢個女講：「呢個係男仔嚟，唔可以隨便俾男仔拖你隻手！」

我心抽一抽住，心諗究竟係幾邪惡嘅人類先會咁樣對天真善良嘅小朋友。雖則我咁諗，為免嚇親我仔我都無當面同佢對質，而且我都唔肯定個仔玩緊究竟有無聽到咁惡毒、咁高高在上嘅說話

一番善意被人咁扭曲，我作為呀媽覺得好嬲，同一時間喺度思考緊究竟係咪應該要教導呀仔唔好同其他女仔有任何身體接觸。小朋友本來就無分性別想玩就一齊玩，以前呀仔細個都試過好多充滿愛嘅女仔會拖住佢喺公園玩，唔通要教佢每次去公園同女仔玩嗰陣要問聲「may I take your hand」先？

點解女仔掂男仔就天經地義，男仔掂女仔就係個女仔有損失？呢個世界會唔會對男仔太苛刻？猶感而家香港男性地位低到連小朋友都受牽連，實在好擔心佢哋大個究竟會面對一個幾咁唔公平嘅世界

讀者投稿@女權贏曬