#ParentLicenses2288

食完飯去Lego store玩，有啲積木俾人自由推砌玩樂。現場冇乜人，咁我同老公就自己整咗隧道、屋仔、車仔俾兩歲半仔仔玩

跟著有個大概三四歲細路入嚟，佢即刻將我哋砌好嘅積木整爛晒。我都明白啲細路係咁樣，所以我都冇講啲乜，預咗係會爛。我個仔明明玩緊個隧道（喺正面前拎架車玩緊）都想整冧，一整冧又會喊

佢爸一開始有講一句話唔好，而且我個仔玩緊㗎嘛，我見佢再想伸隻手埋嚟時，我咪用我隻手去擋住個隧道，再扶返個隧道起身

點知佢爸突然間話我：「你唔好再推我個仔隻手得唔得，而家細路仔玩，你又唔知佢有咩狀況」

我愕然，我冇掂到佢隻手，亦都唔係推，更加一句都冇話過佢個仔。佢個仔唔同人講sorry都算，個老豆見個仔係咁整冧人哋整好嘅嘢，唔好意思都要講下啦，搞到我仔係咁喊，重要話返我轉頭？個仔唔正常唔係大晒囉，又唔係寫住喺額頭「我係問題兒童」

佢唔識道歉，但老豆都要識，而唔係要人哋老奉就晒佢。「細路仔玩係咁」，我明，不過明明人哋整好喺面前玩緊，特登伸隻手想破壞，真係好無家教，乜唔識教個仔「人哋玩緊唔好去搞」？唔識教個仔「每人都有boundary」？

我老公即刻話返佢：「我真係唔知你個仔有咩問題囉，我都想了解下，又冇寫出嚟」不過我費事嘈就即刻走咗，但chok住道氣。

我諗佢可能係SEN或者ADHD，但唔係大晒，同埋基本禮貌都要教，唔係個仔有問題就要人哋就晒佢，呢個唔係理由嚟。如果佢想個個就晒佢，咁咪紋喺額頭話「我有ADHD SEN」囉。個仔唔識，你都要同人哋講返聲唔好意思，而唔係咁樣話返人哋轉頭

真係咩家長都有，識生唔識教嘅都唔少

讀者投稿@蛋糕媽媽