#ParentLicenses2284

本人係一個新手媽媽，自我BB十一個月大開始轉做全職媽媽，每日都營營役役，努力增值睇教養書、各大專頁，努力追post，希望做到一個合格嘅有牌媽媽

成日見到好多負面post，新手爸媽岀街好似做咩都俾人批評，又好多三姑六婆說三道四等等，感慨喺香港好似已經變成唔適合生仔嘅地方

喺全職湊仔呢大半年，唔知好彩定係我孭住仔仔岀入個樣太狼狽，我遇到好多好人好事，就想借呢度發放多啲正能量

當餵奶餵到懷疑人生，屋企人全部都叫我停人奶之際，有個姨姨讚仔仔對脾好大隻，佢問：「你係咪餵人奶呀？辛苦媽媽啦！」當下真係眼濕濕，直頭想攬住佢喊

另外，唔只一次有人幫手攞買餸手推車，各類型的人都有，有少數族裔嘅中學生，也有中年男士，而且有次好誇張有個電動輪椅大叔

又有日搭巴士，有個婆婆送咗個勾俾我，叫我將個袋勾住前面扶手，咁就唔使一手攬仔，一手攞住個袋

喺站頭等小巴，明明寫住入氣，但小巴司機都俾我同BB上車，司機話下一班要等好耐

好多時候，我帶住BB搭車都有各類型的人同你傾多兩句，都係友善嘅；有時會分享一下當年佢哋點湊，有時候又會認可全職媽媽嘅努力同付出

非洲有句名言《It takes a village to raise a child》——有時候旁人只需要釋出好少好少嘅善意，喺新手媽媽眼中都可能係好大嘅能量同肯定

喺呢半年真係好感恩同好真實地體會到，其實香港人重有好多都重係好有同理心，會好肯幫人

讀者投稿@新手全職肥師奶